Eusko Legebiltzarrean, bigarrenez luzatu da lan deialdi publikoetan euskara eskakizunaren inguruan egitekoa duten eztabaida. Pentsatzekoa da araudi berria garatuko dela, baina gobernu bazkideen artean, EAJren eta PSE-EEren artean, ez da itxuraz adostasunik. Izan ere, PSE-EEk dio enplegu eskubidea beti ipiniko duela hizkuntza eskubidearen gainetik.

Gaiaz galdetu diote Euskadi Irratian Iñigo Ansolari, EAJren Bizkai Buru Batzarreko buruari, eta Ansolak berak ipini du mahai gainean ARGIAk ordu gutxi lehenago argitaratutako esklusiba; komunikabide honek frogatu ahal izan duenez, Errenteriako Udalaren lan deialdi bat sabotatu du euskararen aurkako talde antolatu batek. 

Ansolak adierazi du "kezka" eragiten diola "gertatzen ari denak" eta horren atzean "talde antolatuak" egoteak. "Horrelako gauzak gertatu ez daitezen, jendea horrela antolatu ez dadin, derrigorrezkoa da berme juridikoa emango digun araudi bat lortzea, non horrelako helegiteek lekurik izango ez duten", azaldu du Ansolak. Bigarrenez errepikatu du: "Derrigorrez behar dugu lege juridikoa".

Ansolak hitzeman du EAJk "buru-belarri" egingo duela lan horretan, eta iradoki du EH Bildurekin adostu beharreko legea izango dela: "Sentsibilitate ezberdinak bildu beharko ditu legedi honek".