Euskal prentsan ibilbide luzea egina zuen Ainhoa Albisu donostiarra hil da asteazken honetan, ondoez baten ondorioz, Berria-k jakitera eman duenez. Albisu Euskaldunon Egunkaria-n ibili zen lanean, diseinugintzan eta administrazioan, eta gaur egun Berria-n ari zen.

2003ko otsaileko operazioaren ondorioz guardia zibilek Euskaldunon Egunkaria itxi zuten. Juan Del Olmo instrukzio-epaileak sumarioa bitan banatu zuen gero, eta Albisu auzi ekonomikoan prozesatu zuen beste zazpi lagunekin batera, egunkarian administrazio lanetan aritzeagatik; fiskalak bederatzi urte eta bi hilabeteko kartzela zigorra eskatu zuen berarentzat. Egoera horretan egon zen hamaika urtez, auzia Gipuzkoako Probintzia Auzitegira igaro eta honek 2014an betirako itxi zuten arte, preskribitu egin zuelako.

Gipuzkoako Foru Aldundiak Urrezko Plaka eman zien Egunkariako kideei eta Albisu izan zen aitortza hori jaso zuenetako bat Martin Garitano orduko Ahaldun Nagusiaren eskutik, Berria-k gogorarazi duenez. "Auzibide luze hark ez zuen eten Albisuren lanerako gogoa", azaldu dute bere lankideek.