Agenda kulturala

Asteazkenetan, Goizean argi buletinaren azpiko atalak Euskal Herriko agenda kulturalari errepasoa egiten dio. Entresaka bat da datozen egunetan datorrenari. Orrialde honetan atal hori hona ekartzen dugu, buletinean joaten den bezala.

Ez bazaude buletinean izena emanda, eta goizero zure postontzian jaso nahi baduzu, debalde, eman izena hemen.

Dantzari bat aurreskua egiten; igandean jokatuko da Bizkaiko txapelketa.

Gorka Peñagarikano Goikoetxea

Goizeroko buletin bat daukat, 'Goizean argi' deiturikoa. Dohainik harpidetu zaitezke.

2026ko irailaren 2an - 07:00

Inprimatu

Kazetaritza independenteak herritarren babesa du arnas

Egin ARGIAkoa

Musika. Lekeition Antzarrak hasi dira, eta bada zer: gaur Puro Relajo eta Gozategi, adibidez, eta bihar Zea Mays, Marte Lasarte eta Lukiek. Talde mungiarra gaur Iruñean ariko da, Basotxoan. Trapagaranen ere festak dira; bihar, Moonshine Wagon. Ostiralez, Bilboko Kafe Antzokian Nacho Vegas ariko da; Elorrion gerri-dantza izango da Skaregekasko eta Kaparrak taldeekin; Etxaurin zarata pixka bat Perlatarekin; alardearen atariko Skabidean Hondarribian; eta Afrika Bibang eta Petti Villabonan. Zapatuko egitarau zabalaren artean, nabarmentzekoak, adibidez, Xiberoots eta Hazasen kontzertua Haltsun, Mirua eta Bengo Lezaman, Neomak Urruñan, eta Iñurri Eguna izango denez Usurbilen, egun osoko egitarau oparoa dute.
Antzerkia. Kaleko antzerkiaren azken kartutxoak: Azkena eta bagoaz! emanaldia eskainiko du ostiralean Trapu Zaharra konpainiak Atxondon; larunbatean Jokai Produkzioaken Mugarri lana Bastidan; Bilbon Eszena Kalera egitasmoa hasiko da gaur, eta ia egunero eta iraila bukatu artean badira gauzak; eta Txondor Plaza izango da igandean Zumaian. Areto barruko bi proposamen: Iruñeko Gayarren, ostiralean, Denboraren Lapurrak antzezlana taularatuko du Yarleku teatroak; eta Rigor Mortis antzezlanaren aurrestreinaldia izango da Urnietan, igandean, Tanttaka eta Txalo konpainiena.
Dantza. Euskal astea da Zarautzen, eta badira, adibidez, aurresku eta bikote gazteen dantza txapelketak. Eta Donostiako Egia auzoan ere gaurtik ostiral gauera badira zazpi emanaldi programaturik, Egia Dantzan egitasmoan. Azpimarratzeko bi: igandean jokatuko dela Bizkaiko aurresku txapelketa, Leioan; eta eguerdian, Bergarako gaztetxean, Ufadak dantza emanaldia antolatu dute La pulga-rekin.