“Patronalak horrenbeste aipatzen duen absentismoa langileen prekaritatea baino ez da” salatu dute sindikatuek: “Bizitza guztiek ez dute kapitalarentzat berdin balio, eta hori gordintasunez islatzen da lan baldintzetan”. Ildo beretik, “patronalak eragiten duen epidemia hilgarri eta isil baten aurrean” daudela salatu dute, baita salatu ere patronalak ez duela “ezer egiten” honen inguruan, eta “sistematikoki urratzen” duela Laneko Arriskuen Prebentzioari buruzko Legea, “berau onartu eta 30 urtera”.

Era berean, sindikatuek nabarmendu dute “erantzukizunen utzikeria hori” ez litzatekeela posible izango “administrazioaren permisibitaterik eta konplizitaterik gabe”: “Borondate politiko faltak errealitate hau betikotzea ahalbidetzen du”. “Patronalak sortu du arazoa eta orain langile klasea egin nahi du horren erantzule”, gaineratu dute.

Horrela, ustezko absentismoaren atzean “mutualitateen boterea indartzeko, osasun sistema publikoa are gehiago ahultzeko eta pribatizazioan aurrera egiteko asmoa ezkutatzen da”, sindikatuen ustez: “Langileok lanera gaixorik joan gaitezen, eta, ondorioz, langile klasearen eskubideak murriztu eta enpresen etekinak handitu daitezen”.

Hori dela eta, sindikatuek ohartarazi dute borrokan jarraituko dutela, “guztiontzako lan baldintza duinen alde, ikusezinak diren lanen aitortza eta babesaren alde, genero eta arraza esplotazioa amaitzearen alde eta pertsona guztientzako osasun eta bizitza eskubidea bermatuko duen osasun sistema publiko, unibertsal eta kalitatezkoaren alde”.