Peru Abarka lehiaketak otsailaren 27ra arte ireki du helduentzako narrazioak bidaltzeko epea, Markina-Xemeingo Udalaren eta Erein argitaletxearen eskutik. Lehiaketak euskara batuan helduentzako literatura sustatzea du helburu eta bi fasetan banatzen da: lehen fase honetan narrazioak aurkezten dira eta, bigarrenean, narrazio irabazlea ilustratzeko proposamen onena sarituko da. Garaileek 2.500 euro irabaziko dituzte eta Erein argitaletxearen eskutik album formatuan argitaratuko dute lana, narrazio ilustratua hain zuzen. 800 aleko lehen edizio bat kaleratuko da eta irabazle bakoitzari hamar ale emango zaizkio.

Sariduna hautatzeko, epaimahaia Markina-Xemeingo Udaleko ordezkari batek, Erein argitaletxeko ordezkari batek eta sektoreko profesional batek osatuko dute. Epaimahaiak ikusten badu narrazioek gutxieneko kalitate-maila eskuratu ez dutela, saria ez ematea erabaki dezake. Pasa den urteko 18. edizioan, Uxue Razquin Erein argitaletxeko editoreak, Ainhoa Aldazabal literatura-kritikari eta literatura-taldeen dinamizatzaileak eta Mari Eli Ituartek itzultzaile eta literatura-irakasleak hala erabaki zuten eta ez zen saririk banatu.

Lehiaketara aurkezteko oinarriak Peru Abarkaren  web orrialdean kontsultatu daitezke. Lanerako gaia librea da eta partaideko gehienez bi lan bidali daitezke, prosaz edo bertsoz egindakoak. Gutxienez 11.000 eta gehienez 15.000 karaktereko luzerakoak (espazioak barne) izan behar dira. 18 urtetik gorakoentzat eta aurretik egindako lau edizioetan sarituak izan ez direnentzat zabaldu da deialdia. Lanak originalak eta aurretik argitaratu edo saritu gabeak izan behar dira eta ezingo da adimen artifiziala erabili. Antolatzaileek azpimarratu dute 18 edizioetan "uzta ederra" argitaratzea lortu dutela, eta aurtengoan  parte hartzeko deia zabaldu dute. Sariak banatutakoan, Markina-Xemeingo Udalak eskuratuko ditu bost urtez irabazlearen ustiapen-eskubideak, erreprodukzio, banaketa eta komunikazio publikoko eskubideak barne eta ondoren egileenak izango dira.