EH Baikoak edota hurbilekoak ere barne dituen Mathieu Hornen zerrenda atera da bigarren itzulian garaile Bokalen (Lapurdi). Bigarren kokatu da Guy Boulanger –%29,85–, hirugarren orain arteko auzapeza izandako Francis Gonzalez –%17,84–, eta azken, Helene Etchenique –%14,92–. Lehia estua aurreikusia zen lau hautagaien artean, ikusita lehen itzulian guztiak zirela botoen %20 eta %30 lortuta kokatu. Finean, arrakala agertu da lehen bien eta azken bien artean.

Horn biziki pozik agertu da euskal komunikabideek elkarlanean bideraturiko jarraipenean: "Harrotasun handia dut, bokales gisa herria ordezkatzeko hautatu izanaz, harrotasun handia ere zerrenda horren inguruko taldeari buruz. Guztientzat biziki kontent naiz".

Bokaleko lehen itzuliak sorpresa eragin zuen: orain arteko auzapez Francis Gonzales hirugarren kokatu zen –%23,84–, eta garaile, aldiz, EH Baiko kideak ere dituen Mathieu Hornen lista –%28,36–. Lau zerrenda aurkeztu ziren lehen itzulira eta lehia biziki estua izan zuten: 253 botok bereizten zituen garailea eta azken gelditurikoa.