Ikasbide Ikastolako familiok gure kezka adierazi nahi dugu Eusko Jaurlaritzako Hezkuntza Sailak ikastetxean Haur Hezkuntzako eta Lehen Hezkuntzako hirugarren lerro bat ezartzeko hirugarren solairu bat eraikitzeko hartu duen erabakiaren aurrean.

5,6 milioi euroko obra publikoa aurrera eraman nahi dute, ikastola sakon eraldatuko duena eta ikasleei, familiei eta auzoari zuzenean eragingo diena. Erabaki hori gardentasunik gabe hartu da, hezkuntza komunitatearen benetako parte-hartzerik gabe eta inguruan hezkuntza lerro gehiago zabaltzeko beharra justifikatuko luketen datu publiko sendoak aurkeztu gabe.

Urtebete baino gehiagoz, familiok bilerak, informazioa eta azalpenak eskatu ditugu. Jasotako erantzunak eskasak edo hutsak izan dira. Izan ere, berriki Gipuzkoako Hezkuntza Ordezkaritzarekin onartu eta egin den bilera bakarra proiektua jada lehiaketara aterata eta prozesua erabakita zegoenean izan da.

Bilera horretan egiaztatu genuen proiektua ez dela frogatutako hezkuntza premia batean oinarritzen, hipotesi eta prebentziozko eszenatokietan baizik. Arduradunek eurek bileran aitortu zuten:

• Ez dutela etorkizuneko plaza beharren inguruko aurreikuspen fidagarririk.
• Ez dakitela benetan zenbat ikasle irits daitezkeen Ikasbidera.
• Ikastola handitzearen zati handi bat “badaezpada” logikan oinarritzen dela.

Bilera osoan ez zen aurkeztu tamaina honetako inbertsio bat justifikatuko lukeen azterketa teknikorik, aurreikuspen zehatzik edo datu demografiko sendorik. Are gehiago, Ikasbideko guraso plataformak ordezkariei aurkeztutako datuek jokoz kanpo harrapatu zituzten.

Gure analisia Hezkuntza Ordezkaritzak defendatzen duen guztiz bestelakoa eta kontrakoa da:

• Inguruko errealitate demografikoak zalantza gehiago sortzen ditu hirugarren lerro baten beharraren inguruan.
• Azken ikasturteetan plaza libreak geratu dira Ikasbideren hezkuntza eremuan.
• Jaiotza tasak beherantz jarraitzen du oro har, eta bereziki ikastola kokatzen den Loiolako Erriberak auzoan eta inguruko auzoetan.

Honako hau eskatzen dugu: gardentasuna, parte-hartzea eta benetako beharretan oinarritutako erabakiak, ez justifikatu gabeko hipotesietan oinarritutakoak.

Honako eskaerak egiten ditugu:

• Justifikaziorik gabeko hirugarren lerro baterako aurreikusitako 5.600.000 euroko obra eta proiektua berehala gelditzea.
• Datu objektiboetan eta gardentasunean oinarritutako azterketa tekniko eta demografikoak argitaratzea.
• Familiekin eta hezkuntza komunitatearekin benetako elkarrizketa prozesu bat irekitzea.

Gainera, Ikasbide Ikastolan 3. lerro bat eraikitzearen erabaki hau Hezkuntza Saila egiten ari den eskola publikoen ixteen eta fusioen testuinguruan kokatzen da, izan ere, gure eremuan dagoen Katalina de Erauso eskola ixtea erabaki du Hezkuntza Sailak, hainbat urtez eskola horrek jasan duen segregazioa onartu ondoren.

Ikasbide Ikastolako Guraso Elkartea