Urrats bat gehiago eman dute Israelgo diputatuek palestinarren exekuzioaren aldeko bidean: 2023ko urriaren 7ko erasoan parte hartzeaz akusaturiko palestinarrei heriotza zigorra bideratzeko auzitegi militar berezia sortzearen alde bozkatu dute maiatzaren 11ko gauean. 400 bat palestinar dira arriskuan. Astelehen gaueko bozketan egondako diputatu guztiek egin dute lege proposamenaren alde, hots, 93 diputatuk. Une berean israeldar zenbait zeuden parlamentutik hurbil, testu horren kontrako ahotsa entzunarazten. 

Martxoaren 30ean bozkatu zuten heriotza zigorra palestinarrei ezartzeko aukera dakarren legea Israelgo Parlamentuan. Baina testua ez denez atzeraeraginezkoa, lege proposamen berri hori osatu dute, 2023ko urriaren 7ko ustezko erasotzaileak hil ahal izateko.

Estatu sionistaren kontra erasoa egin izanaz akusatuta diren palestinarren exekuzioa ahalbidetzen die martxoaren 30ean bozkaturiko testuak. Lege proiektuaren marko orokorrak dioenez, "herritar edo egoiliar israeldar baten aurka atentatua egiteko asmoz, Israelgo Estatuaren existentzia amaitzeko asmoarekin, nahita, baten heriotza eragiten duen pertsona oro, gizon zein emakume, heriotzara edo betiko kartzelara kondenatuko dute". Epaia eman eta 90 eguneko epean exekutatu beharko dute kondenatua, eta epe hori behin luzatu ahal izango du Israelgo lehen ministroak, 180 egunera igotzeko, baina errugabetasun eta barkamen neurri posiblerik gabe.

Bozketa iragan eta berehala iragarri zuen ACRI Israelgo Eskubide Zibilen Aldeko Elkarteak Auzitegi Gorenean presako helegitea aurkezteko urratsa, legea bertan behera uzteko eskaerarekin. "Konstituzioaren aurkakotzat, berez diskriminatzailetzat eta, gainera, Zisjordaniako palestinarrentzat, oinarri juridikorik gabekotzat" jo du. Helegite horri buruzko epaia ez da oraindik jakina.