Nafarroako Probintzia Auzitegiak 15 urte eta 9 hilabeteko kartzela zigorra ezarri dio Iruñeko kiromasajista bati, 32 eta 56 urte bitarteko bortz bezerori zazpi sexu eraso egiteagatik. Kiromasajista Nafarroako hiriburuan aritu zen lanean 2024 amaiera arte, orduan atxilotu baitzuten, eta behin-behineko espetxealdia ezarri zioten. Fiskaltzak 20 urte eta erdiko espetxe zigorra eskatu zuen; auzipetuak, berriz, “profesionaltasunez” jokatu zuela adierazi zuen, eta ez zuela “deliturik” egin. 

Epaileak ez ditu frogatutzat eman kiromasajistari egozten zizkioten bertze lau sexu eraso eta lesio delitu bat. Bai, ordea, bertze bortz bezerori zazpi sexu eraso egin izana. Izan ere, epailearen txostenaren arabera, bortz emakume horiek jasan duten trauma osteko estresak, kontakizun koherenteak eta peritu psikologoek berretsi dute diotena egiazkoa dela.

Denbora tarte berean masajeekin eta fisioterapiarekin zerikusia duten jardueretan aritzeko debekua ezarri dio epaileak. Erasotzaileak ez du, ordea, denbora tarte guztia espetxean pasako, gehienez 6 urte eta 9 hilabeteko egonaldia eginen baitu kartzelan.

2023 eta 2024 artean

Kiromasajista 2003an hasi zen Extremaduran (Espainia) lanean, eta handik Iruñera joan zen. Hasieran Donibane auzoko zentro estetiko batean egin zuen lan, eta, ondoren, bere etxean.  Nafarroako Auzitegiaren arabera, 2023ko ekainetik eta 2024ko irailera bitarte, bere jarduera profesionalak garatzen zituen bitartean “inguruabar pertsonal, espazial eta intimitatekoak baliatu” zituen biktimei izaera sexualeko ukituak egiteko, haien baimenik gabe. 

Hiru biktimaren arteko ustekabeko elkarrizketa batek piztu zuen alarma. Hirurek harremana zuten kiromasajistarekin, bere familiaren komunitate erlijioso berekoak zirelako, eta haren kontsultara joan zirelako hainbat gaixotasunengatik masajeak jasotzera. 

Bertan izandako pasarteak elkartrukatu zituzten, eta hirurak bat zetozen saioetan “deserosotasuna” sentitu zutela. Kasuen larritasunaz jabetuta, salatzea erabaki zuten. Erasotzaileak, guztira, zazpi salaketa pilatu zituen, tartean bortxaketa bati lotutako bat.  

Kalte ordaina eta urruntze agindua

Kartzela zigorraz gain, epaileak biktimei kalte ordaina ematera zigortu du. Guztira, 39.000 euro ordaindu beharko dizkie; 3.000 eta 12.000 euro artean bakoitzari, kasuaren larritasunaren arabera.

Horrez gain, bortz urteko urruntze agindua ezarri dio epaileak hiru biktimari dagokionez, eta hamar urtekoa bertze bi biktimei dagokienez.