Espainiako Estatuan indarkeria matxistaren biktimak artatzen dituen 016 telefono zenbakira egindako deiak %120,8 igo ziren Espainiako selekzioak Munduko Futbol Txapelketa irabazi ostean, Espainiako Gobernuko Berdintasun Ministerioak jakitera eman duenez. Igoerarik handiena igande horretako 23:00etatik asteleheneko 07:00ak bitarte izan zela zehaztu du El País egunkariak. 

Egun osoko datuak kontuan hartuta, uztailaren 19an partida hasi baino lehen aitzineko igandeetan baino dei gutxiago izan ziren. Partidaren ostean, ordea, nabarmen igo zen kopurua. Astelehenean, berriz, egun osoko datuak kontuan hartuta, igoera % 21,9koa izan zen aitzineko asteko astelehenarekin alderatuta.

Espainiako Gobernuko Berdintasun Ministerioak herritarren eskura paratutako gainerako kanalei dagokienez, kontaktuak ugaritu egin ziren astelehenean: posta elektronikoak %1.000 egin zuen goiti, online txatak  %60 eta Whatsappak % 8,75.

Ikerketek berresten dute

Euskal Herrian ez da inoiz ikertu indarkeria matxistaren eta Munduko Futbol Txapelketaren arteko lotura; bertze herrialde batzuetan, ordea, bai. Batez ere AEBetan eta Erresuma Batuan urteak daramatzate horri buruzko ikerketak eta kanpainak bultzatzen. 

2014an, erraterako, iragarki bat sortu zuen Tender deituriko Erresuma Batuko genero indarkeriaren aurkako erakundeak. Bertan emakume bat ikus zitekeen, beldurrez, urte hartako Munduko Txapelketan Ingalaterrak jokatuko zuen partidaren emaitzaren zain. Iragarkiaren amaieran testu hau ageri zen: "Inork ez du nahi Ingalaterrak irabaz dezan emakumeek baino gehiago".

Urte hartako kanpaina Lancasterreko unibertsitateak egindako ikerketa batetik eratorri zen. Ikerketa horretan, Lancashire konderriko Poliziaren datuak aztertu zituzten, 2002ko 2006ko eta 2010eko Munduko Futbol Txapelketei dagozkienak. Emaitzak Ingalaterrako partidarik izan ez zen egunekin alderatu zituzten, eta ikerlariek ondorioztatu zuten genero indarkeria %38 hazi zela Ingalaterrako selekzioa txapelketatik kanporatu zutenean, eta %26 irabazi edo berdindu zuenean. Ingalaterrako partidu baten biharamunean ere kasuak igo egin ziren; %11, hain zuzen.

Aurtengo maiatzean, Munduko Futbol Txapelketa hasteko aste gutxiren faltan, berriz, NBE Emakumeak eta Unicefek Emakumeen aurkako indarkeria ez da jolasaren parte lelopean kanpaina bat abiatu zuten. Erakundeen kalkuluen arabera, kirol ekitaldi handietan larrialdi lineetara egiten diren deiak %30 igotzen dira.