Emakume eta gizonen soldata berdintasunaren aldeko eguna da gaur, eta, astelehenean egin genuen agerraldian iragarri bezala, Hego Euskal Herriko hainbat enpresatan eskaera bat erregistratzen ibili gara goizean goizetik. Eskaeran, soldata arrakalaren erradiografia zehatz bat egiteko helburuarekin, informazio hau eskatu diegu enpresei: lanak nola antolatzen dituzten sexuen arabera, gizonen soldataren batez bestekoa eta emakumeena, zein kontziliazio neurri eta nortzuk eskatzen dituzten, zuzendaritza karguetan zenbat emakume eta zenbat gizon dauden eta kontrataziorako eta promoziorako sistemak, besteak beste. Datuak bilduta, egoeraren azterketa egin ondoren, diskriminazio egoerak zuzentzeko proposamenak egingo dizkiegu enpresei eta instituzioei.