Joan den asteartean, sektoreko esparru-akordio bat sinatu da Lan Harremanen Kontseiluan, zeinaren bidez EAEko Ikus-entzunezkoen Sektoreko langileei subrogazio-eskubidea aitortu baitzaie.
Esparru-akordio hori lehen pausoa izan da guztiz arautu gabe zegoen sektore bat arautzeko. Izan ere, Ikus-entzunezkoen Sektorea oso egoera prekarioan zegoen, baina honez gero subrogazio-eskubidea lortu da.
Akordioaren eranskinean sektoreko patronalak EAEko ikus-entzunezkoen produkzioaren lehen hitzarmena sinatzeko konpromisoa hartu du, 6 hilabeteko epean. Hitzarmen horren bidez gutxienezko soldata bat bermatuko zaie sektoreko langileei, 19.000 euro gordin urtean.
Lizitazio publikoak direla-eta gero eta prekarioagoa bilakatu den sektore horri egonkortasuna emateko lehen pausoa izan da. Administrazio publikoek lan-prekarietatearen aldeko apustua egitea erabaki dute, lizitazioetan prezioa lehenetsiz; nahiz eta, horrela eginez, sektoreko lan-baldintzak jaitsiko direla jakin. Horren adibiderik garbiena EITBn dugu, non baldintza-orrietan prezioa %35 edo gehiago merkatzen den, eta lazeria eta lan-prekarietatea zabaltzen duten enpresei zerbitzuak esleitzen zaizkien.
ELAtik sektoreko lan-baldintzak hobetzeko ahaleginak egiten jarraituko dugu, eta horrela Ikus-entzunezkoen Produkzioaren I. Hitzarmena aurten bertan sinatzea lortzea espero dugu.