Fekl anunciou que presentará unha solicitude a finais de setembro, na reunión dos responsables de comercio exterior da Unión Europea, en Bratislava. A secretaria de Estado considerou "absolutamente inapropiado" que os representantes de EEUU e a UE sigan negociando o TTIP no clima político actual.

A Comisión Europea, pola súa banda, dixo que as negociacións do TTIP seguen con total normalidade e que a intención é que o acordo estea listo antes de final de ano. Así o respondeu o portavoz Margaritis Schinas nunha rolda de prensa en Bruxelas, preguntado polas declaracións do ministro de Economía alemán, Sigmar Gabriel, sobre o TTIP. Gabriel sinalou que as negociacións están esgotadas de facto , que no catorce roldas que houbo até agora non se logrou ningún acordo, e que a razón principal é que "os europeos non queren dobregarse aos desexos dos americanos".

Desconfiando das verdadeiras intencións de Alemaña e Francia

Algúns dos grupos que participan na campaña contra os acordos de libre comercio cren que tanto as declaracións do ministro alemán como a actitude de Francia ante Matthias Fekl poden ser unha artimaña. O ano que vén haberá eleccións en ambos os estados e as autoridades saben que a opinión contraria ao TTIP cobrou moita forza nos seus respectivos territorios.

Doutra banda, o proceso de ratificación do CETA, xa pactado entre a Unión Europea e Canadá, porase en marcha en breve, e o apoio ao mesmo pode ser un pretexto para que os gobernos francés e alemán lancen declaracións contra o TTIP, segundo as mesmas fontes. Segundo subliñaron, a entrada en vigor do CETA sería, en esencia, como a entrada en vigor do TTIP.