Denbora vs. Kantuak. Hainbeste kanta buruan dauzkazula, sentsazioa duzu ezingo dituzula guztiak kanpora atera?

Inspirazioa den bitartean aprobetxatu egin behar da. Sentsazio berriak bilatzean ideia asko agertzen dira eta hortik abestiak sor daitezke. Idazterakoan diziplinarik ez dut, sekula ez dakidalako noiz etorriko den lehen ideia. Behin etorriz gero, lantzeari ekiten diot, jakina.

Lehenengo aldia da folkean, jazzean eta doinu beroetan hainbeste murgiltzen zarena?

2008an grabatu nuen lehen disko akustikoa. Buruan beti izan ditut ideiak, baina nire burua seguru ikusi nahi izan dut estilo konkretu batzuetako abestiak konposatzeko eta lan hori ondo egiteko. Sentsazio berriak dira eta benetan sentitu izan behar dituzu gozatzeko eta besteekin konpartitzeko.

Zure kantek beti dute berezko goxotasuna. Nekatu zinen iraganeko bortizkeriaz eta amorruaz?

Oraindik ez, baina oreka bilatzen dut. Orain adibidez, urtebete daramat Governors taldean zuzeneko bortitzak eskaintzen eta aldi berean Fignuh Experience proiektu akustikoarekin areto eta antzokietan justu kontrakoa egiten, giro lasaiak eta intentsitateak lantzen.

“Nik badut nire mundua”. Zer da musika zure bizitzan? Zertarako balio du?

Sorpresa kutxa bat, ilusioa sortzen dit eta poztu egiten nau. Txikia nintzenean “Sobre sorpresa” saltzen zuten dendan. Beti irrikaz, zer agertuko. Orain berdina da musikarekin, nolakoa izango da hurrengo abestia? Ikusleekin konektatuko dugu? Hau dena bizitzeak preziorik ez du. Konposizioa, taldeko bizitza, grabazioak, birak... Bizipoza.

“Erantzunik gabeko galderen bide luzean”. Abestiak idazteak erantzunak ematen dizkizu?

Ez, gogoratzen dit erantzunak beti ez direla agertzen, baina aurrera begiratu behar dugula. Bizitza azkar doa eta ezin dugu galdera guztien erantzunen zain egon.