Zaldibiko hamar emakume espetxeratzeko agindu zuen alkateak, “jarrera desegokiak izateagatik”. Aipatu jarrerak, hain zuzen ere, ezkondu gabe sexu-harremanak izatea ziren. Emakumeek hala eskatuta, deklaratzen utzi zieten, eta horietan azaldu zuten harremanetako asko engainuz edo bortxaz izan zituztela, eta denek zeukaten haurren bat edo beste beren kargu. Haur horien aiten aurka ez zen ezer egin.

Emakumeak Barbara Agirre, Maria Bauptista Agirre, Maria Albisu, Maria Bartzelona, Margarita Eleizegi, Maria Juaniz Iraola-Agirre, Katalina Iztueta, Maria Gartzia Jauregi, Maria Arroiz Mendiola eta Mariana Mendiola ziren. Atxilotu ostean, lortu zuten deklaratzea, beren kasuak haizatu ziren eta zenbait egunera askatu zituzten.