Paradoxikoa denik ez didazue ukatuko: urteetan zakurdantzara animatzen gintuzten musikak baztertu eta 1980ko hamarkadako errepertorioari kasik katxi lerdeztatuari bezain tinko eutsi diogunok reggaetoiaren onurak baloratzen hasi garenean, jatorri latinoamerikarreko musikariak etorri zaizkigu esatera euskal rock erradikala dutela inspirazio iturri.
Artikulu interesgarria publikatu du El Confidencial webgunean Jose Duranek, AEBetan indarra hartzen ari diren punk talde berriei buruz. Hego Amerikatik yankee tartera joandakoen alaba-semeak dira, Texas eta Kalifornian bizi dira haietako asko, eta inspirazio iturri gisa Eskorbuto eta RIP bezalakoak aipatzen dituzte. Gehiago gustatzen omen zaizkie RRV etiketapean sailkatu ohi diren Euskal Herriko bandak talde estatubatuarrak baino, azken horien kezka sozialak aspertutako klase ertaineko jendeenak iruditzen ei zaizkielako.
New Yorken abuztuan egingo den Latino Punk Festivalean entzun ahalko dira musikari horietako batzuk Duranek seinalatzen duenez. Txosnan txandak egiteko boluntariorik?
Eguneraketa:
Gotzon Elizburuk Twitter bidez jakinarazi digunez, Adelit@s taldeak Soraluzen jo zuen. Eta taldekide gehienek ez omen dakite gaztelaniaz hitz egiten.
2 Iruzkin
Ni Mexikon egon nintzenean, konturatu nintzen nola iparraldeko (Tijuana eta ingurua) musikariek asko jarraitzen zuten estatu mailan dagoen hardcorea. Ekkaia eta Sin Dios gurtzen zituzten eta Black Panda bezalako taldeen ere oso zaleak ziren, batez ere crustienak, noski. Eta bai, La Polla eta Eskorbuto aita eta amatzat dituzte
Hau mugaren helgoaldean zen, baina iparraldean ere antzekoa izango dela suposatzen dut, hori ia ezin dezaket esan.
Kolonbian ere gauza bera gertatzen da, ezagunenak: Eskorbuto, Kortatu, La Polla, Pîperrak eta Skalariak. EHko txoko askotan baino euskal musika klasiko gehiago entzuten da kar, kar eta kar. Eta alderantziz, gure Hego Amerikako herrialde askotan baino musika latino gehiago entzuten dugu!