Interpelazioa Europako Parlamentuan
Juan Karlos Yurrabaso, Juan Inazio Urrutibeaskoa, Jose Antonio Agirrebarrena eta Jose Manuel Arzallusek Carabanchelgo espetxean diraute zenbaki hau isten dugun unean, bakoitza torturatua izan ondoren osatutako sumario desberdin baten jabe, eta Hego Yemen eta Holandako arazoekin zerikusirik ez duten gaiez akusaturik. Bainan beraiei gertaturikoa ez zela hala holako gauza jakina da. Froga bezala uztailaren 7tik 11 arteko epean Europako Parlamentuan aurkeztuko den interpelazioa.
Maiatzaren 24ean, gogorki esposaturik eta hiru polizi holandesen ''laguntzarekin" (abioi barruan gelditu ziren hauek, inork ez dakielarik zergatik ez zuten nahi lurralde espainola ukitzerik) iritsi ziren Barajasera lau euskal errefuxiatuak, abioiaren atetik irten bezain pronto polizi espainolaren esku gelditzeko.
Gertaera honen bidez, Holandako gobernuak lehen aldiz bere historian, hankaz gora botatzen zituen terrorismoari buruz dituen legeak. Estradizioak egon dira Holandan, bainan beti hauzietatik pasa ondoren. Oraingo honetan ez zen hola gertatu eta Holandan bertan ere jendea ez dago batere ados Administrazioak izaniko konportaerarekin. Mendebaleko Europak ere ez du hori gehiegi onartu. Oposizioa behintzat zeharo haserre agertu da (eta oposizioa aipatzerakoan boterean ez dagoen guztia sartzen dugu).
Haserre horren muestra bezala flamendar diputadu baten eskutik uztailaren 7tik 11 ra bitartean Europako Parlamentuan aurkeztuko den interpelazioa. Parlamentuak hala edo holako erantzuna eman beharko du.
Erantzun horren jabe izan bitartean, galdera batzuk egin dizkiegu gorago aipatuteko errefuxiatuei, eta hona hemen hartutako erantzuna.