Koronabirusak eragindako zisma politikoari, Errusia eta Ukrainaren arteko gatazkari eta Pegasus espioitza sareari dagokienez, Iñaki Izquierdo kazetariak hauxe idatzi du: “Pandemia, gerra eta kapitalismoaren hondamendiari ezer falta ez izateko, Mossad agertu da berriro”. Ertzaintzaren kasuan, Mossad behin eta berriz agertzen zaigu.

Israelgo segurtasun agentziaren eremuan dagoen enpresa bat arduratzen da Ertzaintzaren Erandioko eta Oiartzungo superkuartelak zaintzeaz, baita Polizia eta Larrialdietako Eukal Akademiaren segurtasunaz ere. ICTS enpresari buruz ari naiz, Espainiako aireportuetako sarbideen kontrolean espezializatua da eta Eusko Jaurlaritzak kontratatu zuena Bermeo, Ondarroa, Lekeitio eta Mundakako portuetako segurtasun zerbitzua emateko. Horra konfiantza adibide bat.

Ausardia horien ondorioz, Ertzaintzak erabiltzen duen telefono-entzuketa sistemaren jabea Verint Systems israeldarra da, Pegasus spywarea saltzen duena. “Ahotsa grabatzeko ekipoak” Neptune Intelligence Computer Engineering (Nice) enpresari erosi zizkioten, enpresa hori Israelgo Armadako kide ohi batzuek sortu zuten. Motorola Solutions, Israelgo Armadaren smartphone-etarako enkriptatze-sistemaren fabrikatzailea, Ertzaintzaren Enbor Komunikazio Sarearen eta euskal poliziaren Tetra irrati mugikorreko sare digitalaren grabazio-sistemaren euskarrien arduraduna da.

Aspaldiko jarraibidea da. Ertzaintzaren Komunikazio Sareko irrati loturen instalazioa Ceragon Networks eta ECI Telecom konpainia israeldarren ardurapean burutu zen. Israelgo teknologia banatzen zuen enpresa batek, Micro-Link-ek, bideozaintzarako kamerak bidali zizkion Eusko Jaurlaritzako Herrizaingo Sailari, Ertzaintzak Israelen orratz baten tamainako mikrofonoak erosten zituen bitartean. Garai hartan, Tandu Technologies & Security Systems israeldarrak, Israelgo Barne Ministerioko kontratista zenak, ikastaroa eman zion Ertzaintzari.

Anaitasunaren beste erreferentzia bat aipatzearren, S21sec talde gasteiztarrak Voyager Labs israeldarraren produktuak banatzen ditu. Talde hori Ertzaintzaren informazio sistemaren aholkularitza zerbitzuez arduratzen da. S21sec taldeak, Ertzaintzaren kontratista diren Ikusi eta Vicomtech erakundeekin batera, Carper segurtasun proiektu europarrean parte hartu zuen, Israelgo Barne Ministerioaren lankidetzarekin.

Afera ezagunena da Israelgo inteligentzia zerbitzuko kargu ohi batzuek osatutako Guardian Defense & Homeland Security enpresak granada jaurtigailu bat eta balen aurkako txalekoak saldu dizkiola Ertzaintzari. Herri batzuetako udaltzainek Rabintex marka israeldarraren balen aurkako txalekoak erabiltzen dituzte.

Beraz, CAF Beasainena Jerusalemen ez da anekdota hutsa, zuhaitz batek ez baitu uzten basoa ikusten.