DNA Argentinakoa, akzio eta bizigunea Euskal Herrian eta arima rock gitarrero bizienean iltzatuta duen hirukoteak gogo biziz jarraitzen du rock indartsuenari prestigioa eta ikusgarritasuna gehitzen. Horretarako, gogor dihardute inurri lana egiten eta uneoro inbestigatzen zein arakatzen. Izan ere, sinestezina dirudi Martin eta Conik bi bururekin gidatutako sendagaiak orain arte lortutako guztia: Europa zein AEBetatik kontzertuz kontzertu izerdiaren truke ikusleak banan-banan irabazi, bi kontinenteetan diskoen banaketa zabala bermatu, Bowieren aldeko miresmena dotoreziaz eta maisutasunez gauzatu eta, besteak beste, Tony Visconti handiarekin grabatu izan dituzte diskoak. Aukeratu duten bizitza iraupen luzeko maratoia dela badakite eta ez dute okerreko pausorik eman nahi; baina, hala ere, ez diote inoiz arakatzeari eta esperimentatzeari utzi nahi izan, arriskatuz.

Euskaldun-argentinarren hamabigarren diskoak ere oso presente dauka arakatze eta ikertze hori; eta honakoan giro psikodelikoa, iraganeko taldeen ukitu misteriotsu eta inguratzailea bermatu dute. Biform jostaria da, rockeroa bada ere, elektronika eta espazioko deiadarra ere jasotzen dituena. Siren’s lips 60ko hamarkadako garaje gitarreroa ia. Cry with you surf-poparen gardentasuna apurtuta psikodeliaz lohitu eta lokatzez itotzen da bortizki. Are gehiago, rock garage zikina hard-rockarekin lotzen duen Sphiux. Red moon falls-ek 77ko leloak Eskandinaviako hard-rockera erakarri ditu. Azkenik, Dead summer-ek asko du antipodatako Flying Nun-en slow-surfaren kadentzia eta misteriotik, nahiz eta rock melodikoari ere eusten dion.

B aldean giro eta erritmo hipnotikoak dituen Away for heaven sasi-garageoak egin digu ongietorria. Atzetik dator The Lords Of The New Church handien Russian Roulette klasikotzarra, Stukaren laguntzarekin borobildutakoa. Around 60ko hamarkadako lelo eta melodia itzelak dituen power-pop oparia. Magnets ezer falta ez zaion hit!a, bere baitan kolpekada zehatzak eta sarkorrak, Television-en gitarra eta rock bizia batuta ere baduena. Dry your mind garage psikodeliko gitarreroa da. Eta Flaming waves psikodeliatik ere edaten duen rock melodiko malenkoniatsua.