2013ko udazkenean amaitu zuten Aginagako (Usurbil) bizilagunek eliza zaharra eraberritzen. 60ko hamarkadan eliza berria eraiki zenetik, zaharra elkargunerako erabiltzen hasi ziren, harik eta 1992. urtean bigarren solairuko zorua erori zen arte. Auzolanean egindako eraberritzearen ostean, erabilgarri dago berriz.
Elizan kontzertuak eta jaietarako txosnak antolatzea ez da ohikoa. Usurbilgo auzoan, ordea, hainbat hamarkadatako tradizioa da. Aginagak betidanik izan du herri izaera indartsua eta eliza zaharrak elkargune funtzioa bete du 60ko hamarkadatik. Besteak beste, Kaotiko edota Su ta Gar taldeak aritu dira bertan.
“Hainbat urtez erabili dugun arren, azken urteotan eliza zatika erortzen ari zitzaigula ohartu ginen –dio Aritz Aranburu aginagarrak–, paretak erortzen ari ziren, itoginak genituen, leihoak hormatuta zeuden. Usurbilgo Udalari konponketak egiteko eskatu genion behin baino gehiagotan, baina ez zegoen haien lehentasunetan, eta lana atzeratzen ari ziren”. Azkenean, 2009. urtean, auzotarrek erabaki zuten eurek emango zutela urratsa.
Hala, Bidean Agiñarron Herri Elkartea sortu zuten, gazte eta helduak biltzen dituena. Herriko bi eraikuntza enpresa konbentzitu zituzten konponketa lanetarako materiala uzteko eta aholkularitza lanak egiteko. Horren ostean, euren proiektua txosten batean bildu eta gero, Udala konbentzitzea ere lortu zuten. Bizilagunek auzolanean dirua bildu bazuten ere, Udalak ordaindu zizkien enpresaren gastuak. “Konponketa lan guztia, ordea, herritarron artean egin dugu –azaldu du Aranburuk–; erremintak hartu eta egin ahala ikasi dugu”.
2013ko otsailean hasi zituzten lanak eta sei hilabetetan lehenengo erreforma amaitu zuten. Inaugurazio bazkaria egin zuten, eta ordutik, Aginagako elizak aurreko elkargune funtzioa bete du. “Egunerokoan erabil daitekeen zentroa izatea nahi dugu. Lehenago zuen festarako funtzioaz gain, ekintza kulturalak gehitu dizkiogu. Oraingoz poesia errezitaldiak, bertso afariak eta antzezlanak egin ditugu, baina gure asmoa da herriari bizia emango dion proiektu jarraiagoa egitea. Auzotar orok gozatu ahal izango dituen jarduerak egin nahi ditugu, hala nola adinekoentzako pilates eskolak edo haurrentzako babesgunea”.
Asmoak asmo, halako proiektu bat sortu eta mantentzea lan zaila dela aitortu du auzotarrak. “Horrelako egitasmoen motorra gazteok izan ohi gara, baina guk ere lan eta okupazio asko ditugu urtean zehar, eta ezin diogu nahi adina denbora eskaini. Bestalde, orain arte borrokarako eta jairako gunea izan denez, zaila egiten ari zaigu adin ezberdinekoei eliza ere eurena dela adieraztea. Pixkanaka lortuko dugula uste dugu”.
Konponketaren bigarren fasean sartzear dira aginagarrak. Goiko solairua berreraikitzeko helburuz, dirua crowdfunding bitartez lortzea espero dute. “Eta horretarako, kanpoan Aginagaren irudia ezagutarazten ari gara. Jendeak gure proiektuan sinesten badu, laguntza emango dio”.
Nafarroako erdialde eta erriberako nekazariei eta euskalgintzari babesa adierazteko produktu loteen eskaerak egin daitezke Errigora. eus webgunearen bitartez. 'Eutsi geureari' izeneko kanpaina abiarazi zuten atzo eta martxoaren 13ra arte aukera dago saski horietako... [+]
Hamar urte dira saskiekin hasi zirela eta bi milioi euro bildu dituzte guztira.
50 euroko saski bakar eta "biribila" eta komunitatea batuko duen argazki erraldoia atera nahi dituzte urteurrena ospatzeko kanpainan. Azaroaren 9ra bitartean egin daiteke saskien eskaera.
Baserritar bat abereak gobernatzen edo traktorea gidatzen irudikatu beharko bagenu, ziurrenik gizon heldu bat imajinatuko genuke. Erreportaje honetarako elkarrizketatu ditugun baserritarrek, ordea, erakutsi digute iruditeria folkloriko horren atzean badaudela landa eremutik... [+]
Nafarroa erdi eta hegoaldean euskaraz ikasi bai baina erabiltzeko aukera gutxi du haur askok. Herri horietan aisialdia euskaraz gozatu ahal izateko asmoz jaio ziren Jolasteka ludoteka euskaldunak. Ikasturte honetan gutxienez 16 herri, 22 jolasteka eta 3 eta 12 urte arteko 211... [+]