Egungo idazle galiziarrak beren lurraldetik at ezagutarazi nahiko lituzke argitaldariak, baita nazioarteko egileak aipatu hizkuntzetara itzuli ere. Sushi Booksek hiru bilduma aurkeztu ditu oraingoz: Albuma –irudidun liburuak, batik bat–, Bitartekoa –Lehen Hezkuntzako irakurleei zuzendua–, eta Aurreratua –haur handiagoentzat aproposagoa–.

 

Euskarazko publikazioei dagokionez, Ostiral irudidun albuma dugu merkaturatzen lehena. Santiago Freire idazlea eta Dani Padrón ilustratzailea ditu egileak eta Robinson Crusoeren laguna du protagonista: “Baliteke niri buruz zerbait entzun izana, baita nire lagun Robinsoni buruz ere, baina beti haren ahotik izango zen. Orain, nik kontatuko dizuet nola ezagutu nuen gizon zuria”. 

 

Webgunean ikusten ahal denez, Ole Lund Kirkegaard-en Otto Errinozerontea eta Orla igelontzi, Érica Esmorís-en Amabelen boterea, Carlos Freireren Zabor mutantearen misterioa eta Antonio M. Fraga Allegueren Xildar eskuragarri izango ditugu aurki.