Javier Lacunza ezagutzeko jakin-mina nuela daitort. Orain arte, hamar urtez, itxita egon diren Baluarteko ganbera aretoa edota harresien erakusketa eremua zabaltzera etorri den gizona. Eta berrikuntza gehiago heldu dira bere eskutik: musika molde orain arte ez oso ohikoak ari gara gero eta gehiago entzuten, Julieta Venegas iaz, laster Suzanne Vega eta Duncan Dhu. Gazteentzako deskontu handiak daude hainbat ikuskizunetan, eta euskara entzun daiteke megafoniako mezu grabatuetan. Zerbait bada, bederen. Aste Santuan haurrentzako antzerkia euskaraz programatu zuten lehen aldiz, Benito Lertxundiren kontzertua ere izan zen arrakasta handiz duela gutxi eta urriaren 5ean Iruñea Kantuan jaialdia eginen da… Azken urte hauetan ez gaude ohituta, egia esan, halako pertsona kulturzalerik topatzen goi karguetan Nafarroan.