Balenciagak jantzitako izarrak

Ava Gardner.
Ava Gardner.

Lau hamarkadatan 20 film baino gehiagotan lan egin zuen Cristobal Balenciagak emakumezko aktoreen jantziak diseinatzen. Orain, Balenciaga Museoak eta Pedro Usabiaga argazkilariak jostunak zinemarekin izan zuen harreman hori bildu nahi izan dute. Piéges (1939), Nuits d’alerte (1946), Anastasia (1956) eta North by Northwest (1959) dira film horietako batzuk. Balenciagak jantzi zituen aktoreen zerrenda are deigarriagoa da: Elizabeth Taylor, Ingrid Bergman, Marlene Dietrich, Ava Gardner, Grace Kelly...

Argazkietako batean Marlene Dietrich ageri da Paris When It Sizzles (1964) filman, auto batetik irten berri, gona zuzenaz eta patrikadun jakaz osatutako boli koloreko traje bat soinean. Anastasia (1956) pelikularen argazkian Ingrid Bergmanek kolore bereko zetazko soineko bat darama, bi xingola brodatuz apaindua. Erakusketako alerik ederrenetakoa Ava Gadnerrek The Angel Wore Red (1960) jantzi zuen gaueko soinekoa da. Filmaren izenburuak aingerua gorriz janzten zela dioen arren, “munduko animaliarik ederrenak” (hala esaten zioten Ava Gardnerri) daraman soinekoa zetazko gaza beltzez egina da, erpinean amaitzen den eskote zabalekoa. Eskuineko uhalean paparreko bat du apaingarri, eta handik zintzilik ehun bereko exarpea.

Baina hori guztia argazkitan soilik ikus daiteke, argazki erakusketa baita. Faltan botatzen da jantziak bertan ikusi ahal izatea. Horregatik, erakusketa toki ezin hobean dago, museoan getariarraren nahi adina jantzi ikusi (eta ia ukitu) daitezkeelako. Eta Getariako kaleetan Balenciaga mutikoa imajinatu dezakegulako, Casatorreko markesaren soinekoek liluratuta, egunen batean halako jantziak diseinatuko zituela ametsetan, zinemako izarrik handienak bere artelanentzat mihise izango zirela susmatu ere egin gabe.

Zinema, Balenciagaren amets bat

Erakusketa Non: Cristobal Balenciaga Museoa, Aldamar Jauregia, Getaria. Noiz: urriaren 13a arte.


Kanal honetatik interesatuko zaizu: Gomendioak
Eguneraketa berriak daude