Kaleko arteak zeru, lur eta itsasoaren konkistan

24. Lekeitioko Nazioarteko Kale Antzerki Jaialdia

Taldeak: Zoroen itsasontzia, Hortzmuga, Markeliñe, Rue Barre, Deabru Baltzak, Trapu zaharra, Sacude... Non: Lekeitioko kaian, kaleetan eta plazetan. Noiz: uztailaren 12an, 13an eta 14an.

Horrelakoetan esan ohi dena esango dudala eman dezake, eta hala ere bota egingo dut, errealitatetik gertuago dagoelako topikotik baino: Lekeitioko Nazioarteko Kale Antzerki Jaialdia bakana da, zalantzarik gabe aparta, maila horretako gainerako ekimenen aldean. Ez baitu klown, zirko, malabarismo edo antzeko proposamenetan oinarritzen bere ekarpena; abangoardiak osatzen baitu bere eskaintzaren funtsa, eta antzerki independenteak, kale-arte garaikideak, berria den sormen orok. 25 urte daramatzate horretan. Alegia, ez dela ahuntzaren gauerdiko eztulik hemen.

Lekeitioko jaialdia lehena izan zen kale kultura hauspotzen, eta berria berritzen eman du mende laurden hau, nazioarteko izaera areagotzen, bertaratzen den ikuslegoa gero eta jantziago bilakatzen, zeru-lur-itsasoak beretzat hartzen. Aurtengoan kaia izango du, besteak beste, espazio konkistatu berria.

The Ship of the Fools edo Zoroen Itsasontziak –Azart kultur elkarteak kudeatua, hainbat herrialdetako aktoreak dira tripulatzaileak–, Pasaiako urak behin-behingoz utzi eta Lekeition porturatuko da. Monsieur Jourdain xelebrea antzeztera datoz, Molièreren Le Bourgeois Gentilhomme obra oinarri hartu duen obra da, M. Bulgakov errusiarrak idatzia. Ia estreinaldia dela esan liteke, ez baitute orain arte aukera handirik izan taularatzeko. Parte-hartzaileek diotenez, munduko hizkuntza guztien gorazarre modukoa da obra. Portutik portura dabilen eskifaiak han eta hemen zenbait hizkuntzatatik hartutako ele, esaldi eta abestiak nahasiko baititu ikuskizunean (tartean, katalana, italiera eta holandesa). Aipagarria, bestalde, herri xehea euskaraz mintzo dela obran, eta burgesak gaztelaniaz.

Marea gora kontuan hartuta, hiru saio eskainiko ditu Zoroen Itsasontziak, Lekeition: ostiralean (uztailak 12) 19:00etan, larunbatean 19:30ean, eta igandean 20:00etan. Ikusleek kaitik jarraitu beharko dute saioa, kofradiaren aurrean jarriko diren harmailetatik. Kopurua mugatua izango da eta bakoitzak bere pisuaren araberako sarrera ordainduko du: kiloko 17 zentimo. Gizenak egon bitez lasai, 77tik gorako kilorik ez baita kontuan hartuko. Alegia, inork ez du 13 eurotik gora pagatu beharko. Ordaindu beharreko ikuskizun bakarra izango da.
Espazio horizontala aski ez eta bertikala ere konkistatzera joko dute Lekeition, herriko kanpandorretik zintzilik jarri eta dantza ikuskizuna eskainiko baitu Kataluniako Sacude taldeak. Duela zenbait urte egin bezala, aurtengoan ere aho bete hortz utziko dituzte ikusleak, elizaren estilo gotikoa arte garaikidearen euskarri bilakatuta.

Stock Umoreak, arte eszenikoen eta ikus-entzunezkoen nazioarteko eskola sortu berriak, Lekeitio Off egitasmoa aurkeztuko du, bestalde. Hamabost eguneko tartean zazpi umorezko lan labur erakutsiko dira kaleetan (lehen saioa dagoeneko egina da, ekainaren 30ean). Erabat bukatu gabeko obrak dira gehientsuenak, jaialdira bertaratzen den publikoaren erreakzioa lagungarri izango dutenak.


Kanal honetatik interesatuko zaizu: Antzerkia
2024-02-28 | dantzan.eus
Lau pastoral plazaratuko dira 2024 urte honetan

Aurtengo urtea emankorra izango da pastoralei dagokionez, lau pastoral emango baitira; bi Zuberoan eta beste bi Zuberoatik kanpo: Iruñean (Nafarroa) eta Xarneguko (Lapurdi-Nafarroa Beherea) zonaldean. Gure herriko lau historia ezagutaraziko dira oholtzan antzerki,... [+]


Xabin Fernandez eta Intza Alkain. 'Kanpora sartzen' antzezlana
"Zuen bizitzan lehen aldiz, herrian ikusiko duzue GIBa"

2013an, medikuaren telefono deia jaso zuen Xabin Fernandezek (Legorreta, Gipuzkoa, 1985). Diagnostiko garbia eman zioten: GIBa. “Seropositiboa zara”. Bizitzak 360 graduko buelta eman zion orduan. Mamuak agertu zitzaizkion: beldurra, amorrua eta lotsa, besteak beste... [+]


2024-02-13 | Euskal Irratiak
Oier Araolaza
"Libertimenduak herrietako harremanak erregulatzeko eta egituratzeko tresnak dira"

Nehoiz baino negu epelagoa izanik ere, ihauteek udaberriari dei eginen diote. Ihauterietako asteburu gotorrena heldu da. Irisarrin Donibane Garazin, Donostiako Añorga auzoan edota Iruñean libertimenduak izanen dira, Irurin maskaradak eta Lapurdiko hamaika herritan... [+]


Eguneraketa berriak daude