Karmele Rotaetxe Amusategi hizkuntzalari bilbotarra hil da, 81 urte zituela. 1979ko abenduan euskaltzain urgazle izendatu zuen Euskaltzaindiak, eta 2004ko azaroan ohorezko euskaltzain.

Filologia Modernoan lizentziatua, Rotaetxek Deustuko Unibertsitatean eta EHUn eman zituen eskolak, eta New York Academy of Sciences erakundeko kide izan zen. 1977an, Ondarroko euskarari buruzko tesia egin zuen, Koldo Mitxelena zuzendari zuela.