Ezusteko azterketa

Antton Olariaga

rtikuluotatik ezagutzen nauen inork gutxik sinetsi arren, oraindik neure burua poetatzat daukat (hauek ditut betegarri); horregatik, orain aste batzuk Alexek kontatutakoa ironia plantarekin hartu nuen. EGArako irakasleak nire artikulu bat eman zien galdera batzuekin. Berehala galdetu nion zein artikulu, bitarteko huts moduan, iritzia eman ziezadan, eta sotilki nire kezka estetikoak berari azaldu ahal izateko, bereziki –gauza ongi joanez gero– logelen dekorazioaren alorrekoak. Zoritxarrez eskolara huts egin eta azterketa emana berri zioten, etxean egin zezan. Irakurri gabe zeukan. Atera eta erakutsi zidan. A... artikulu hori... Fukushima eta nuklearrak. Orduan ideia bat bururatu zitzaidan, nire izaerak (egolatra eta kanpolarrosa) bultzatuta.

Nire artikuluari buruzko galderak nik neuk erantzuten uzteko konbentzitzeak lanak eman zizkidan. Ez al zuen ulertzen egoeraren ironia biribila? Beranduago gogoeta egin dut, ikasteko gogoak baino, nirekin berriro gelditu behar ez izatekoak mugitzen zuela, erantzunak e-mailez bidaltzeko aukera iradoki nionean amore eman zuelako azkenik.

Egin, bidali eta, orain gutxira arte, ez dut haren berri gehiagorik izan: Suspenditu dut (edozeinek, duela paragrafo bat edo bi, suposatuko zuen bezala, ironia eta biribiltasunaz zertxobait dakien edozeinek). Alexek haserre dirudi.

Egia da iruzkinean artikuluaren kontra argudiatu dudala. Porrokatuki. Berehala detektatu ditut nire arrazoibidearen ahulguneak (argi esanda: falaziak) eta diskurtso aurrerakoi nahi hori agerian uzteari ekin diot; baina ez nuen espero, egitean, hainbeste ergatibok eta mugagabek huts egin izana. Esaldiak hurrenkera egokian ez omen ditut erabiltzen. Eta, irakaslearen arabera, testuaren zentzua ez dut harrapatu. Irakasleak ez du batere baloratu nire asmo ____-a, hutsune batzuk ez betetzean, testua nirean hain ____ diren apainkeriez arintzeko.
Lagunak, ni larri ikusita, garrantzia kendu nahi izan dio, euskaltegiko euskara ____-n, nirea bezalakoan, “aizu, ez ezazu jan burua, zergatik ez dugu gero lasaiago erabaki bat hartzen elkarrekin?”. Hala ere, nik ezin izan dut itxaron eta, bestearen ordainetan, okertezinezko azterketa bat prestatu diot, gure artekoa konpontzeko. Gorde apunteak oraintxe eta atera boli bat.

Ariketak

1.– Ordezka itzazu azpimarratutako hiru hitzak ondorengo bat bakarrarekin: a) bare; b) zuri; c) motel.

2.– Egun “ironia” hitzaren abusua dago, kontuan izanik behin aipatuta desagertzen den zerbait dela. Testuan letra lodiz nabarmendu ditugu; ordezka ezazu bakoitza ondorengo hitz batekin: a) zentzugabe; b) txulo; c) mundu.

3.– Hutsuneak bete itzazu (bakarrik beharrezkoa bada) ondorengo hitzen batekin: a) eder; b) aspergarri; c) txar; d) jator; e) sexy.

4.– Ulermena: Aukeratu erantzun zuzena.

4.1.– a) Egileak Alexen logela ezagutu nahi du; b); Alexek e-mailez gelditu nahi du; c) Elkar aztertu nahi dute.

4.2.– a) Egilea nuklearren alde dago; b) Aurka dago; c) Aurreko bi erantzunak zuzenak dira; d) Aurreko hiru erantzunak zuzenak dira (baita hau ere); e) Aurreko esaldia okerra da Wittgeinsteinen Tractatusaren 3.332 puntuagatik; f) Aurreko esaldia zuzena da, beraz, artikulu hau guztia okerra da.

5.– Idazlana. Zer irizten diezu hau bezalako testu autorreferentzialei? Ihesbidea da? Hala bada, zeretik? Nuklearren gaitik? Gertuagoko egoera politiko usteletik? Nork zuzentzen gaitu? Sasi-demokrazia hau salatu ahal da betiko hitzekin? (400 hitz).


Azkenak
2024-03-31 | Julen Azpitarte
Zinearen historiako film-kontzerturik “onena”

Oscar sari andana jaso zuen The Silence of the Lambs (1991) thriller-a zuzendu zuen Jonathan Demme (1944-2017) zinegile estatubatuarrak estreinatu zuen zineak inoiz eman duen kontzerturik onena: 1970eko hamarkadaren erdialdean New Yorken eratutako Talking Heads taldearen Stop... [+]


"Enpresa pribatuen esku utzi da segurtasun publikoaren norabidea"

Ertzaintzaren azken hamarkadako bilakaera teknologikoa aztertu du bere liburu berrian Ahoztar Zelaieta ikerketa kazetari, kriminologo eta ARGIAko kolaboratzaileak. Segurtasunaren industria ikertu eta Ertzaintzarekin duen lotura plazaratu du, La Ertzaintza que viene... [+]


Campi Bisenzioko GKN fabrikan batu dituzte langile borroka eta ekologismoa

2021eko uztailaren 9an jaso zuten kanporatze abisua Campi Bisenzioko GKN lantegiko 422 langileek. Biharamunean berean abiatu zuten fabrikaren okupazioa eta orduz geroztik bertatik dabiltza borrokan, deslokalizazioaren aurkako borroka zena bestelako industria eredu baten aldeko... [+]


Judith Bilelo Biachó
"Erakundeek ez digute lagunduko, guk geure hizkuntzan hitz egitea lortzen ez badugu"

Judith Bilelo Biachó gure artean izan zen iragan udazkenean, Garabideren Aditu programaren karietara. Ekuatore Ginean jaioa (Malabo, Bioko, 1975), bubi etniako kide da, bubiera hiztun eta hizkuntzaren aldeko militantea. Iraganaz bezainbat mintzo da orainaz, geroari... [+]


Eguneraketa berriak daude