Yuri Alexeyevich Gagarin 1934ko martxoaren 9an jaio zen Klushinon, SESBn. Bere aita arotza zen eta bere ama nekazaritza lanetan aritzen zen. Oinarrizko ikasketak burutu ondoren, Gagarin fundizio-ingeniaritzan espezializatu zen.

Bere ametsa hegan egitea zenez, 20 urte zituela aeroklub batean izena eman eta oso emaitza onak lortu zituen. Hortik pilotuen akademiara joan eta kosmonauta izateko hautatutakoen artean egotea lortu zuen.

1961eko apirilaren 12an Gagarin espaziora bidali zuten, eta grabitate eza sentitzeaz gain Lurra espaziotik ikusi zuen lehen gizakia izan zen. Bere hegaldiak 108 minutu iraun zuen eta Lurrari bira bat eman zion 27.000 km/h-ko abiaduran. Bidaiaren akabera ez zen oraingoen antzekoa izan, paraxuta erabili baitzuen lurreratzeko.

1968ko martxoaren 27an hil zen Gagarin, gidatzen ari zen MIG abioiarekin istripua izan ostean.