Hainbat sektorek Espainiako Gobernuaren eta EAJren arteko akordio hori kritikatu dute. “Uko egite politiko larria” dela esanez, “enplegu politika propioak galarazten” baititu. Kritika horren eredu gisa, ELAren jarreraren laburpena jaso dugu. Sindikatu abertzaleak enplegu politika gaietan erabakitzeko ahalmena euskal erakundeen esku dagoela aldarrikatzen du. ELAren ustez, Lan Harremanetarako eta Gizarte Babeserako Euskal Esparruaren barruan dago. Sindikatuaren arabera, akordioak ezarri behar diren enplegu politikei buruz erabakitzeko ahalmena ukatzen dio EAEri. Eusko Jaurlaritza Espainiako Estatuan erabakitako politiken kudeatzaile eta laguntzaile hutsa izatera mugatzen du. Horrez gain, akordioak Kontzertu Ekonomikoaren irizpideekin bat letorkeen finantzazioari uko egiten dio eta horrek galera ekonomiko handia dakar. Politika aktiboen eta politika pasiboen kudeaketa bereizten du.