Estatistikek oso argi uzten dute: bost biztanletik batek zurrunga egiten du normalean. Horietako askok, arazoa konpontzen saiatu ordez, bere “ezaugarri” berezia balitz bezala hartzen dute, konturatu gabe luzarora osasun-trastorno larriak ekar ditzakeela, iktus bat edo miokardioko infartu bat esaterako; izan ere, zurrunga egitean gorputza ez baita behar bezala oxigenatzen. Horrez gain, arazoa ez da soilik zurrunga egiten duenarentzat, haren ohekideak ere gauero jasan behar baititu zarata-hotsak eta loaldiaren etenaldiak. Konponbidea bilatzeak bikotekide bien mesedea ekarriko du.

Zurrungaren arrazoiak oso ugariak dira; izan daitezke anatomikoak (sudur-trenkada desbideratua, edo ahosabai luzea edukitzea), edo arnas arazoak (hozturak, sinusitisa, alergiak), edo baita kilo gehiegi izatea ere. Konponbidea, noski, jatorriaren araberakoa izango da. Medikuarengana joan bitartean, hona hemen aholku erraz batzuk:

- Utzi erretzeari. Tabakoak faringeko mukosa narritatzen du. Zurrunga egiten dutenek hobekuntza handia sumatzen dute erretzeari uzten diotenean.

- Aurre egin gain-pisuari. Gehiegizko kiloek, beste kalte askoren artean, zurrungaren kontrako kirurgia eraginkorra ez izatea ere ekar dezakete.

- Ez edan alkohol gehiegi. Alkoholak, besteak beste, eztarriko muskulatura gehiegi erlaxatzen du, eta horrek trastornoaren agerpena erraztu dezake.

- Egin lo albo batera etzanda. Jarrera horretan lo egiteak arnasketa errazten du. Oheburua zertxobait altxatzea ere komeni da.

- Eztarri-inguruko ariketak egin. Airea txanda laburretan hartu ahotik, eta ondoren mantso-mantso bota, ezpainak txistu egiteko moduan jarriz. Horrek eztarriko muskuluak tonifikatzen ditu.

Sarritan, zurrunga gogaikarri horien arrazoia etxeko botikinean egon daiteke. Eztularen eta minaren kontra inolako arreta-neurri berezirik gabe –eta askotan, medikuaren errezetarik gabe– erabiltzen diren botika batzuek kodeina dute, eta substantzia horrek zurrunga egitea eragiten du. Kontuz, beraz, etxeko erremedio eta botikekin.