Erretretak: sua langile eskubideen azken barrikadan

  • Kolpetik, hiru urtetan, Europako langileria pasatu da asteko 35 orduko lanaldia aldarrikatzetik 60 urteko borroken poderioz ukiezinak ziruditen eskubideak galtzeko zorian edukitzera. Jubilazioak dira horren eredu. Finantzen krisia gainditzeko estatuek inprobisatu politikei aurre egiteko indarrik ez bide dago, salbu eta Frantzia zaharrean.
Pello Zubiria Kamino @pellozubiria
2010ko azaroaren 07a
erretreteak
Fermin Goiriz bati hartu diogu irudia Pantin es distinto blogetik. Alderdi Obrero Independentearen afixek "Ez hunki gure erretretak!" diote lau hizkuntzetan idatzita. "Frantzia, Grezia, Espainia, Portugal... aldarrikapen bera" ipini diote aurretik, nahiz eta begi bistakoa den Grezian eta Frantzian bai izan direla mobilizazio gogorrak erreforma ultraliberalak gelditzeko helburuz, baina ez dela berdin gertatu orain arte Espainian eta Portugalen. Agian urrunegi iritsi da Nicolas Sarkozy bere planetan? "Erretretena gerta dakioke "ôidatzi du Fr├ęderic Lordonek"ô gehiegizko urratsa, agian pilatu zaizkio erreforma lotsagabearekiko jendearen arbuioa, finantzen munduak erakutsi espektakuluarekiko nazka izugarria, ez kapitalismoaren beraren baina bai gaur dauzkan formen kontrako protesta eta bizimodu baten defentsa". Hitz jokoa eginez, Frantziak erreforma baino iraultza behar duela.
Frantziak 1968ko maiatzetik hona ikusi duen greba eta mobilizazio uholde handienaz zer esan dezake kazetari euskaldun-espainiarrak? 2020ko albistegietan “Orain dela 10 urte...” tituluekin oroituko direla jakinagatik, zail egiten zaio ongi ulertzea zer dela eta mobilizatu diren hainbesteraino Hexagonoan are atzerakada minberagoak nozitu behar dituzten Ingalaterran edo Espainian baino.

Hego Euskal Herrian eta oro har Espainian iritzi emaile nagusiak, izan ezkerreko edo batik bat eskuineko, ortodoxia neoliberalari jarraitzen zaizkio analisietan.

Antton Perez Calleja bat honela trufatu da Frantziako langileen mobilizazioez: “Asko ari naiz dibertitzen Frantzian jubilazioak direla eta gertatzen ari denarekin. Oraingoa ez da txintxoen eta gaiztoen arteko borroka, non herria oldartzen baita gaizkia absolutuaren kontra, kapitalismo zurgatzailearen aurka. Honetan ez da berdin. Sistemaren administratzailea, Estatua, ari da abisatzen ikaratuta kontuak ez direla ateratzen. Aktiboei eskatzen die lan gehiago egiteko, pasiboei gutxiago kobratzeko. Ekuazioa orekatu behar dela”.

Ezkerreko irakurketak askoz ugariagoak izan dira Frantzian. Kaleetako matxinada justifikatu edo esplikatu duten iritzi emaileen artean bat aukeratzekotan, Le Monde Diplomatiqueren blogen atalean La pompe à phynance (Finantzazko punpa esan genezake euskaraz) animatzen duen Frédéric Lordon-ek “Erretreten urtze puntua” izeneko artikulua plazaratu du. Luzea, konplikatua, baina argudio sendoz argitzen duena langile askok aspalditik susmatua: urte luzetako iruzurretan azkena eta agian garrantzitsuena dela jubilazioekin agintariek antolatu dutena.

Araugabetze politika ikaragarri baten barruan, dio Lordonek, Gobernua bi komunitate oso ezberdini mintzo zaio. Batetik dago nazioa osatzen duten herritarren komunitatea eta bestetik dago mundu mailako finantzek osatzen dutena. Eta bere arbitro lanetan, Estatuak “bigarren indar hauei ematen die arrazoi lehenengoaren kontra”.

Horra finantzen globalizazioak ekarri duen egoera berria: “Uste genuen herri burujabea zela Estatuaren komunitate erreferentzia bakarra (...) baina ikusi dugu agintariek ez dutela manatzen zilegitasuna eman dieten herritarren alde, beste batzuen alde baizik”. Hots, mundu mailako “merkatuek” ez diezaioten Estatuaren zorrari AAA kategoria kendu (“la retraite contre la triple A” laburbiltzen du Lordonek) herritarren jubilazioak aldatu behar omen dira, gainera berehala.

Frantziako legebiltzarrak erreforma bat onartu du publikoki, baina itxurazko aldaketaren azpian mudantza askoz sakonago bat ari da gertatzen. Alegia, frantsesez retraite par capitalisation eta gaztelaniaz capitalización individual de pensiones deitzen dena. Azken hamarkadotan denetan zabaldu den sistema da, neurri txikiagoan edo handiagoan diru publikotik kobratu behar den jubilazioa osatzekotan.

Oraindik gure artean ezkerreko jende askok ere aitzinamendutzat dauzkaten pentsio sistemok, Lordonen iritzian, langileak preso uzten dituzte aurrezkiok kudeatzen dituztenen besoetan. Aurretik, pentsio sistema publikoa hondatzen utzi dute, lehenago trenbideak, posta, osasun edo laguntza zerbitzuak, eta abar luze bat hondatzen utzi eta pribatizatu ostean.

Zahartzaroko gure sosak

Zerbitzu sozialen helburua zenez herrialde bateko aberastasuna, eta ondorioz ongizatea, hein batean banatzea, pribatizazioak hankaz gora bota du urteotan lorpen hori, klaseen arteko leizea sakonagotuz.

Ongizate estatua eraisteko lanean jendeen psikologiarekin jokatu dute “erreformatzaileek”. Indibidualismoarekin, alegia. “Denak nor berea zaintzen, bakoitza bere kalkuluetan murgildurik, ez daukalarik sistemari amore ematea beste aukerarik, bakoitzak onartzen du eskueran jartzen diona”. Pentsio plan pribatuekin horixe gertatu zaio edonori, Lordonentzako: miseriazko jubilazioa iragarri zaionez, sarritan bere printzipioak irentsi eta txanpon batzuk sartu ditu edozein pentsio planetan.

Aldiz, orain hemen ezarri nahi den sistema pribatuaren emaitza negargarriak ikusita daude Estatu Batuetan. Lordonek aipatzen ditu National Bureau of Economic Research erakunde publikoarentzako Robert Novy-Marxek eta Joshua Rauhk egin ikerketaren emaitzak. Haiek erakutsi bide dute AEBetako pentsio funts gehienek, publikoek barne, dirua galdu dutela urteotan.

Pentsio funtsek nondik edo handik etekina atera nahian apostu arriskutsuak egin dituztenez, burbuila guztien eztandak jasan dituzte, hasi Internetekoarenetik eta subprimeen hondoratzeak zapartatu zueneraino. Baina finantzen munduko espekulazio zirimolan harrapatuta, funts horiek ordaindutako lobbyek presio egin dute Washingtonen, eta azkenean Obama presidenteak berak indarrik gabe utzi du George Bushen agintean, 2006an, pentsioen ahalmena bermatzeko erabakitako legea.
Ondorioz, dio Lordonek, “iragarrita dago AEBetako langile askok ez duela beste aukerarik izango Matusalenen urteak bete arte (ahal badu, noski) lanean jarraitzea baino”.

Urteotan erretretez zabaldu diren zurrumurruek zenbat ez dute lagundu pentsio pribatuak orokortzeko xedea? Ororen buru, propaganda pagatzen duten mutualitate eta abarrek –finantza sistemaren zati direnek– beti kobratuko dituzte beren komisioak, pentsio funtsak irabazi ala galdu.

Horrelako aurrezki planetan harrapatuta langileak zail dauka finantza sistemari hortzak erakusten. Bestalde, mundu osoan ugaritu diren berregituratze operazioetako askotan horrelako funtsak dabiltza inbertsioak egiten... eta milaka langile kale gorrian uzten. Ustez langileak jabe dituzten funtsak auzo herrian beste beharginak mixeriara jaurtikitzen.

Sistema berriak preso hartutako beharginen erreakzioak aurrikusteko beste termometro bat berrikitan BP petrolio konpainiak Mexikoko golkoan eragin kutsaduraren ondorengoa izan da. Garbiketa lanak eta indemnizazioak oso garesti aterako direnez, BPren akzioek sekulako beherakada nozitu zuten Londresko burtsan, non Footsie indizearen oinarrietako bat den. Britainia Handiko milioika pentsiodun eta jubilatugai larri bezain haserre ibili dira hilabeteotan, aurrezkiak nola galtzen zituzten ikusirik.

Ororen buru, plangintza honekin Frantziako eta hein batean Europa aberatseko nortasun agirietako bat jarri da auzitan: erretretekin belaunaldien arteko solidaritatea eta sortutako irabazien zati bat zahartzaroan berriz banatzea baimentzen zuena. Bankariek izugarri gogortu dituzte langileen bizi baldintzak. Berdina lortzear dira zaharrekin.
Kanal honetan artxibatua: Pentsioak

Pentsioak kanaletik interesatuko zaizu...
2018-05-21
Milaka pentsiodun irten dira kalera asteleheneroko protestan: larunbateko manifestazioetara deitu dute

Azken astelehen guztiz bezala, milaka pentsiodun irten da herri eta hirietako karriketara beren bizi baldintza eskasak salatu eta pentsio duinak aldarrikatzeko. Datorren larunbatean, maiatzak 26, burutuko den manifestazioetan parte hartzeko dei egin dute.


2018-05-07 | Miren Osa Galdona
EAJ-PP arteko akordioak ez ditu pentsionisten aldarrikapenak isildu

Indar erakustaldia egin zuten pentsionistek beste behin Donostian, Bilbon eta Gasteizen. Milaka pertsona bildu ziren PPk eta EAJk hitzartutako igoera nahiko ez zela izan aldarrikatzera. Maiatzaren 26rako ere mobilizazioak iragarri dituzte.


2018-05-06 | Juan Mari Arregi
Bat eginik pentsionistak desmobilizatzeko

PPren eta EAJren interesak batu egin dira Estatuko Aurrekontu Orokorrak salbatzeko, pentsionistak hauteskunde-merkantzia balira bezala erabilita.


2018-04-26 | Juan Mari Arregi
Bat eginik pentsionistak desmobilizatzeko

PPren eta EAJren interesak batu egin dira Estatuko Aurrekontu Orokorrak salbatzeko, pentsionistak hauteskunde-merkantzia balira bezala erabilita.


2018-04-25 | ARGIA
EAJ eta Rajoyren gobernua akordiora iritsi dira: pentsioen igoera, aurrekontuak erraztearen truke

EAJk iragarri duenez, Espainiako Gobernuak onartu du pentsioak Kontsumorako Prezioen Indizearen (KPI) arabera igotzea 2018an eta 2019an, aurreikusita zegoen pentsio minimoen %3ko igoeraz gain.


2018-04-20 | Miren Osa Galdona
Manifestazio gehiago iragarri dituzte pentsionistek maiatzerako

Euskal Herriko pentsionistek batzorde koordinatu bat sortu dute, “hobeto” antolatzeko asmoz. Maiatzaren 5ean eta 26ean mobilizazioak iragarri dituzte Gasteizen eta Iruñean.


Pentsio sistema publiko eta propioaren aldeko manifestazioa, apirilaren 22an

Espainiak pentsioak %0’25 handitzea kritikatu, eta, horren aurrean, Kontsumo Prezio Indizearekin batera igoko diren pentsioak defendatu dituzte Sasoian eta Pentsionistak martxan elkarteek.


2018-04-15 | Juan Mari Arregi
Defentsak %10,7; pentsioek %0,25

Gobernu batek aurkezten dituen Aurrekontu Orokorrak bere balio sistemaren eta ideologiaren ispilu izan ohi dira. Espainiako Estatuaren kasuan –Hego euskal herritarrei ere eragiten die–, oso ongi islatzen du balioen sistema hori: kapitalaren eta AEBak bezalako potentzia handien zerbitzura dagoen gobernu neoliberala da, NATO erakunde militarrari gero eta ekarpen handiagoa egiten diona.


2018-04-01 | Igor Agirre
Pentsio duina: denon lanak, denon eskubidea

Euskal Herriko pentsionistak kalera irten dira pentsio duinak aldarrikatzera. Bosgarren urtez jarraian, Hego Euskal Herriko erretirodun eta alargunek %0,25eko igoera jasoko dute beren ordainsarietan. Gutxieneko pentsioa 1.080 euroan jartzearen beharra azpimarratu dute, pentsiodun askok –nagusiki 65 urtetik gorako emakumeek– bizi duten pobrezia egoera salatuz.


2018-04-01 | Juan Mari Arregi
Urkulluk eta Barkosek ezin dute beste aldera begiratu

Euskal pentsionisten etengabeko mobilizazio masiboek ezin dituzte Hego Euskal Herriko arduradun politikoak axolagabe utzi, Uxue Barkos eta Iñigo Urkullutik hasita. Ezin dute Madrilera begiratu eta ezikusiarena egin, arazoa beraiena ez balitz bezala.


ASTEKARIA
Azkenak
EGILEA
Eguneraketa berriak daude