Elai Alai Gernikako (Bizkaia) dantza taldearen historia eta nondik norakoak gogoratzeko eta bertan dantzatu duten guztien lana eskertzeko, liburua argitaratu du Txomin Unzaluk: Gernika-Lumoko Elai Alai XX. mendean. Hirurehundik gora orrialdez eta beste horrenbeste argazkiz osatutako bilduma horretan laurogei urtetik gorako ibilbidea jaso du. 900 bat lagun dira guztira, historia honetan biltzen diren protagonistak.
Jesus Mari Lazkano margolari bergararraren lanak jarri dituzte ikusgai Bilboko Arte Eder Museoan, Lazkano. Arkitekturatik naturara izenburupean. Artistak berak egin du hautaketa, inongo komisariorik gabe, ikusleekin lotura areagotu nahian. 80 lan baino gehiago paratu ditu artistak, eta horietatik 20 obra sekula publikoaren aurrean erakutsi gabeak dira. 2011ko urtarrilaren 16ra arte egongo dira ikusgai.
Bilblogari lehiaketak Bilbon euskara sustatzea du xede. Hango blogari euskaldunei zuzendurik dago Udalak eta Nontzeberri webguneak sortutako ekimena. 15 eta 35 urte bitartekoek har dezakete parte eta lanak azaroaren 22a baino lehen aurkeztu behar dira. Blog pertsonal onena, taldeko blog onena, blog tematiko onena eta blogik originalenari, bakoitzari 300 euroko saria emango diote.
Zientziategia (webgunea jarri du abian Eusko Jaurlaritzako Hezkuntza Sailak. Unibertsitatekoak ez diren irakasleei zuzendurik dago, eta albisteak, agenda, loturak eta zientziaren inguruko baliabide gehiago eskainiko ditu. (www.zientziategia.euskadi.net)