I-29: doikuntzen kontrako euromanifestazioa

Irailaren 29an, asteazkenarekin, kalitatezko enpleguaren eta hazkunde ekonomikoaren aldeko europar manifestazioa egin da Bruselan. Manifestazioa joan den ekainean deitu zuen Sindikatuen Europar Konfederazioak (CES). Bere barruan daude ELA sindikatu abertzalea eta CCOO eta UGT sindikatu espainiarrak. Zenbait hedabidetan, data hau erabili izan da CCOO eta UGT sindikatuen alde egiteko, esanez mobilizazio horrek greba orokorra zuela oinarri Europa osoan; baina ez da egia. Europan, aurreko hilabeteetan hainbat greba orokor egin da, doikuntza neurriekin langileen eskubideek izango dituzten murrizketen kontra egiteko –Grezian, Irlandan, Errumanian, Frantzian, Italian...–. Euskal Herrian ere lau greba orokor egin dira hamahiru hilabetean –bi Iparraldean, azkena joan den astean, eta beste bi Hegoaldean.

Irailaren 29ko euromanifestazio handia beste mobilizazio batzuekin lagundu dute sindikatuek Europa osoan. ELAk, CES-en parte denez, jadanik iragarria zuen euromanifestazioan parte hartuko zuela. Pasatu dena da, Espainiako Estatuan CCOO eta UGT sindikatuek edozer greba orokor atzeratzen ibili direla, elkarrizketa sozialaren argudioarekin, eta irailaren 29ko datan aitzakia paregabea aurkitu zuten Espainiako Estatuan greba orokorra deitzeko, konbikzio handirik gabe bazen ere. Deialdi horren emaitza –artikulu hau data hori baino bi egun lehenago idazten ari gara– nahiko mugatua izango da Espainiako Estatuan, baina Hego Euskal Herrian, gehiengo sindikal abertzaleak parte hartzen ez badu, deialdiak porrota bermaturik dauka.