Hamargarren urteurrena ospatzeko Gaztezulok 2010eko hasieratik hainbat ekimen abian ditu. Dena dela, urria hilabete trinkoena izango da. Ondoko lerroetan duzue egitasmoen berri:

Bideo lehiaketa: Lehenengo aldiz antolatu dute, eta aldizkariak bezala, Hi eta hire munduak du leloa. Gaia oso irekia da, norberak konta dezala bere mundua. Baldintza bakarra dago, euskaraz izan daitezela lanak. Azaroaren bukaeran epaimahaiak (Jon Garaño, Jose Mari Goenaga, Koldo Almandoz, Egoitz Lasa eta Aitziber Garmendia) bideo lanen balorazioa egingo du. Sariak Euskararen Nazioarteko Egunaren inguruan banatuko dira. Sari nagusia 1.500 eurokoa izango da, eta horrez gain, Donostiako Euskararen Udal Patronatuak ikus-entzunezkoetan gastatzeko 1.000 euroko bonoa emango dio Donostian bizi den edo bertan ikasten duen gazteari. Bideoak Euskaltube edo Youtuben zintzilikatu eta lotura Gaztezulori bidali behar zaio. Gaztezulok jaso ahala zintzilikatuko ditu bere webgunean.

Festa: Bilboko Kafe Antzokian, urriaren 15ean izango da, Esne Beltza musika taldea lagun. Sarrera doan da eta oparitxo sorpresak izango dira.

Gaztezulo Saria: Urtea bukatu aurretik, lehen aldiz emango dute sari hori. Urte hasieratik irakurleek galdera bati erantzun diote, alegia, azken hamar urteotan egindakoagatik zein euskal gazteri emango lioketen Gaztezulo Saria. Iraileko Gaztezuloren arabera Maialen Lujanbio bertsolaria doa sailkapenean aurrena eta bigarren dira Gorka Urbizu musikaria eta Koikili Lertxundi futbolaria.

Urriko zenbaki berezia: Hamaika idazlek eta hainbat ilustratzailek azken hamar urteotako atzera begirakoa egin dute. Bebe abeslaria eta Marta Etura aktorea elkarrizketatu dituzte. Argazkien txokoan, profesionalen lanak beharrean irakurleek bidalitakoak argitaratuko dituzte. Zenbaki honetan atal berria estreinatuko dute, irakurleek kirol gehiago eskatu baitute. Beraz, kirolak atal berezia izango du hemendik aurrera eta urrikoan mendi lasterketetan aritzen den Kilian Jornet katalan gaztea elkarrizketatu dute.