"Erridikulu handia ari dira egiten, baina hori auzitegiko salan geratzen da"

  • Amorotoko alkate izan zen Maribi Ugarteburu 1999tik 2004ra. Baltasar Garzónek auzipetu egin zuen Udalbiltzaren kontra 2003an hasitako operazioaren barruan. Egunotan Auzitegi Nazionalean epaitzen ari dira beste 21 lagunekin. Lanbidez kazetaria da.
Maribi Ugarteburu
"PSEko ordezkariek esan digute alderdi barruan badagoela horrelako auzi politikoak bertan behera uztearen aldeko jarrera zabala, nahiz eta bistaratzen ez utzi".Dani Blanco
Goiogane baserrian sukaldeko ekonomikak berotzen du negua, Lekeitiotik datorren itsasoko haizeak freskatzen uda. Maribi Ugarteburuk (Amoroto, 1968) etxean igaro ditu egun sargoriok, bertako bakea ahalik eta gehien arnasten. Gutxi barru Madril zaratatsura itzuliko da, Auzitegi Nazionalera, fiskalari esplikatzera Udalbiltza ez dela ETA: “Jendeak dirua musutruk jartzen zuen lagundu nahi zuelako, ez duzu ulertzen ala?”

Argudio guztiz nobeleskoak erabili dituzte”. Zure hitzak dira, aldizkari honi esanak Udalbiltzaren kontrako operazioa gertatu eta gutxira. Zazpi urte pasa dira eta nobela ez da bukatu.



Eta amaiera jakinik gabeko nobela izaten jarraitzen du, hori da txarrena. Egoera politikoaren arabera, haizearen arabera, izango du amaiera. Autoa behin bakarrik irakurri nuen, berriro ez diot heldu katxarro horri, baina lehen esaldian jartzen du tesia, eta ezin duzu sinestu: “Udalbiltza-Kursaal ETA-Ekinen tresna bat da”, baieztapen horrekin hasten da. Ondorengo guztia hori frogatzen ez duen gauza inkongruente bat da; gure jarduerak delituaren froga balira bezala hartzen ditu: EHNA tramitatu izana, Etxepare Lizeoari lagundu izana... Ez dauka ez hanka eta ez bururik.

Zazpi urte, urte asko dira, denbora horretan epaiketaren itzala atzean edukitzeak nola eragiten du eguneroko bizitzan?



Ohitu egiten zara, edo uste duzu ohitzen zarela, ez duzulako beste erremediorik. Baina oso gogorra da, ezin duzu epe luzerako planik egin. Pentsa, 2007an egin zuen zigor eskaria fiskaltzak eta epaiketa berehala etorriko zelakoan geuden. Harrez gero hiru urte pasa dira eta denbora horretan uneoro izan gara tentsioan: “Hurrengo hilean izango da, ez, hurrengoan...”.

Hainbeste auzipetu izanda, egoera oso ezberdinak biziko dira zuon artean, ezta?



Bai, pertsona bakoitza mundu bat da. Hasteko, gutako bat kartzelan dago jada; Udalbiltzako langile izandakoak ere hor daude, erabakirik hartu ezin eta hala ere kartzelan sartu zituzten; bestetik, seme-alabak ditugunok asko gara, haurtzaindegi bat muntatu dezakegu nahi izanez gero... Ez da berdina batzuek eta besteek izan dezaketen ikuspegia.

Udalbiltza auziak antzekotasun handia du Egunkaria auziarekin: izaera, akusatzeko modua... Egunkariaren kasuan fiskalak ez zuen akusatu, baina zuenean bai. Nola uler liteke jarrera aldrebes hori?



Politika da, politikaren alde maltzurrena. Gu peoitxo batzuk gara, Euskal Herriko gatazka deitzen den joko taula zail, konplikatu eta mingarri horretan. Nire iritzia da Udalbiltzak baduela osagai politiko oso garrantzitsua: nazio izaera ordezkatzen du, eskubide subjektuaren kontua mahai gainean jartzen du. Bere bizitza labur eta korapilatsuan, Udalbiltzak seguruena egin zezakeen hobeto, baina demostratu zuen posible zela gauzak egitea, eta horrek karga politiko handia du Estatuarentzat. Akusazioaren galderetan badaude batzuk oso kuriosoak: “Zuek zer nahi zenuten muntatu, Estatu paralelo bat?” Bada bai, nahiko genuke Estatu bat izan, baina ez paraleloa. Orduan, zergatik mantentzen duen fiskalak eskaria? Pultsu politiko bat delako, baina oso zaila da jakitea azpian zer presio eta iritzi dauden.

Dena den, Egunkariako sententzia absolutorioa aurrekari positibotzat duzue.



Sententzia mamitsua da eta epaileak ez zuen zertan hainbeste busti: tortura aipamenen kasuan, eta guretzat interesgarriena dena, indukzioa atzekoz aurrera egin zela esatean –gurean ere hala delako–. Sententzia atera zenean ikusi genuen argia zegoela tunelaren beste aldean. Baina automatismorik ez dago, Egunkarikoak libre geratu izanak ez du esan nahi gurekin berdin egingo dutenik. Lasaitzeko tentazioa askok eduki du... baina lasai? Nola egongo naiz lasai Auzitegi Nazionalarekin?

Udalbiltzaren kontrako operazioa, besteak beste, hauteskunde plataformak ilegalizatzeko erabili zuten Aznarren garaian. Testuinguru hori aspaldi pasa zen arren, auzia epaiketara iritsi da.



Auzitegiko instantzien aldetik badago halako setakeria bat, hasitakoa bukatu arte mantentzeko. Gu bildu izan gara PSEko ordezkari batzuekin eta askotan esan diegu: “Aznarrek bere gehiengo absolutuarekin hasitako bideari segitzen duzue hauspoa ematen”. Beraien erantzuna beti izan da justizian konfidantza eduki behar dugula, eta kito. Auziak orain ez du zentzurik, zentzua 2003ko testuinguruan izan zuen, urte ikaragarri bat. Pultsu totala gertatu zen eta gure kasua baliatu zuten jokaldi berarekin Udalbiltzaren kontra egin eta plataformak ilegalizatzeko. Baina gezur bat erabili zuten horretarako: esan zuten gu ibili ginela hautes-zerrendak egiten. Gu ez ginen horretan ibili eta hori beraiek badakite.

Behin hasierako helburua beteta, ematen du patata bero bat geratu zaiela auzitegian, ez atzera ez aurrera...



Bai, eta hori epaiketan zehar ikusten ari gara. Gu ez gara neutralak, baina behatzaile bezala joan direnak harrituta daude akusazioak erakutsi duen ahultasunarekin eta agerian geratzen ari den ezerezarekin. Ez baitago ezer. Erridikulu handia egiten ari dira, baina noski, hori sala horretan geratzen da.

Eta horrek zer aho-zapore utzi dizue?



Entzunda nuen zirku bat zela, baina ez dakit nola esan... sentitzen zara erabilia, 21 pertsonen bizitza dagoela aurrean dituzun horien esku, eta sentsazioa oso arraroa da. Dena den, lehen egunetako deklarazioekin oso pozik geratu ginen, beraiek entzun nahi zutena baina dezente gehiago kontatu baikenien. Bazegoen estupefakzio puntu bat beraiengan, buruan beste pelikula bat dutelako.

Akusazioaren galderei ez erantzutea erabaki duzue. Zergatik?



Batetik, ez dugulako onartzen fiskalak egiten duen planteamendua, gezurrez josia, gu horri pentsua ematera ez goaz. Baina arrazoi praktiko batengatik ere bai. Epaiketan kronometratu egin genuen: soilik galderak leitzen hamazazpi minutu egin zituen fiskalak. Lehen galderan fresko zaude, hamargarrenean ere bai, baina laurogeita hamabosgarrenean hasten dira zalantzak, pentsatzen ez duzun zerbait esan eta kontraesanean eror zaitezke... Ez gara joko horretan sartuko.

Epaileen jarrera zein izan da orain artekoan? Gomez Bermudez da buru.



Broma gutxi berarekin. Hitz egiten utzi digu, ez digu moztu, eta hori eskertzekoa da, nahiz eta epaileak berez hori egin behar lukeen. Baina begira Angela Murillo. Oraindik gogoan dut nola jokatu zuen 18/98ko epaiketan Jose Luis Elkororekin: 70 urte pasata, berak duen historiala eta lasaitasuna... hasi zerbait kontatzen eta “usted cállese!” esan zion.

Datorren astean hasiko da epaiketaren hurrengo fasea, lekukotza gehiago eta perituen deklarazioekin. Zer etorriko da?


Dokumentazio mailan hain agerikoa da ez dagoela ezer. EHNA tramitatzeko paperak, bileren aktak... Zer egin behar dute horrekin? Ez dugu kezka handirik. Hortik aurrera, gure lekukoen deklarazioa Udalbiltzaren isla polit bat izatea nahi genuke. Baina 140 lekukotik 21 bakarrik onartu dizkigute eta horietatik batzuk jada adierazi dute Madrilera joateko ezintasuna, azken batean urte asko pasa dira.

Epaiketa hurbildu ahala babes zabala jaso duzue gizarte eragile eta alderdiengandik. Espero al zenuten?



Klabea izan da zain ez geratzea. Baina lehen momentutik lan horrek erantzun ona izan du. Alde batetik, 60 eragile sozialen atxikimendua jaso dugu, arlo guztietako jende oso ezberdina dago horien atzean. Bestetik, PP salbu, gainerako alderdi guztiekin eduki dugu harremana, baita PSE eta PSNko hainbat ordezkarirekin ere. Azkeneko hauek adierazi digutena da, nahiz eta bistaratzen utzi ez, alderdi barruan badagoela Udalbiltza bezalako auzi politikoak bertan behera uztearen aldeko jarrera zabala, zuzendaritzak konpartitu ez arren.

Eta espero ez zen isiltasunik izan al da? Instituzioen aldetik, adibidez?



Isiltasun instituzionala bai egon dela. 2008an Gasteizko Legebiltzarrak ez legezko proposamena onartu zuen auzia salatzeko. Orain beste gehiengo faltsu bat dago eta ez Legebiltzarrak ezta Jaurlaritzak ere, ez dute ezer egin. Idoia Mendiaren hitz batzuk bakarrik entzun ditugu, esanez epaiketa zazpi urte atzeratzea justiziaren kontzeptuaren kontra doala. Egia da, baina hori da esateko duzun guztia? Bada, hanka motz.


Giro politiko berezian gaude, bake prozesu bat hastear dela dirudi. Itxaropenerako bide ematen al dizue horrek?



Noski. Aurreko auzietan ere oso argi geratu da: sententziak ematen dira egoera politikoaren arabera. Adibide garbiena 18/98koa da. Epaiketa hasita zegoela, 2006ko su-etena eta elkarrizketak etorri ziren. Epaileak horrela esan omen zuen: “Orain zer egiten dugu hauekin?”. Baina hainbeste luzatu zuten epaiketa, tartean gauzak okertu zirela, eta saria izan zen gehienak barrura sartzea. Oraingo testuingurua hobea da, distenditua delako, baina maltzurra ere bada, Espainiako Estatua ari baita pieza ahulenekin estutzen, presoekin esaterako. PPren garaian baina gogorrago ari dira, ez bakarrik presoekin, baita senideekin ere. Gure auziarekin zer egingo duten? Auskalo, estutzeko edo lasaitzeko erabili.
“Txip aldaketa ematen ari da, mediatismotik harago”
“Ukaezina da denbora kontua dela. Borondate politiko asko ari da batzen, akaso polikiegi, baina oinarrizko gai batzuen inguruan batzen ari dira: demokrazia arauak errespetatu beharra, oinarrizko eskubide guzti-guztiak errespetatu beharra, aukera politiko guztiek eduki behar dutela eskubidea plazan egoteko... Horrelako kontuetan ari dira batzen borondateak eta hori ez da bi egunetako kontua, ez da kanpaina bat, ez dauka zerikusirik hauteskundeekin, ezta soilik distentsio armatuko egoerekin ere, harantzago doan kontzeptua da.

Orain, berehalakoan, nik ez dakit zer gertatuko den, elkarrizketa politikoak taxuz eta ganoraz aurrera aterako ote diren; eta xake taula honetan gure auziarekin zer gertatuko den ere ez dakit. Baina epe luzera begira bai, txip aldaketa bat ematen ari da, mediatismotik harago doana. Eskubide zibil eta politikoen inguruan –norbanakoak nahiz kolektiboak– pentsatzeko modu bat lantzen ari gara apurka-apurka, eta denbora eta talentua horren alde jarri behar da. Nik horretan daukat itxaropena.”.

Kanal honetatik interesatuko zaizu: Normalizazio politikoa
2021-10-22 | ARGIA
Ongi etorrien inguruan Sortu “hausnarketa” egiten ari dela adierazi du Arkaitz Rodríguezek

ETAren biktimek modu “zintzoan, eraikitzailean eta pribatuan” egiten dizkieten eskaerak beti “aintzat” hartu dituela adierazi du Sortuko idazkari nagusiak, eta ongi etorrien kasuan “eskaera horiek betetzen saiatzeko” ahalegina egingo duela.


2019-11-05 | Josu Iraeta
Egun gutxi barru, zer?

Gaur ez bezala, duela berrogei urte, euskaldunok egoera berri baten atarian ikusten genuen etorkizuna.Nafarroan eta EAEko Autonomi Estatutuak indarrean zauden. Hain ibilbide latz eta luzeari irtenbideak ikusten hasi ginen eta askatasunaren taupadak zoratzen gintuzten. Ura bai... [+]


Abstentzioa

Behin eta berriz esaten digute maiatz inguruan egingo direla Hego Euskal Herriko udal hauteskundeak, diputaziokoak Araba, Bizkaia eta Gipuzkoan eta forukoak Nafarroan. Hori ikustekoa bada ere, noiz egingo diren ez digu inongo kezkarik sortzen. Azken batean, lau urterik behingo... [+]


2015-07-21 | Mikel Asurmendi
Politika
Inventarium

40 urteko diktadura frankistaren ondoren, beste horrenbesteko demokrazia aldia beteko da aurki. Demokrazia izan edo ez izan, indarrez hasi eta ahituz joan den gatazka armatuaren testuinguruan bizi izan dugu aro politiko hau.


2014-12-07 | Iván Giménez
Gatazkaren alde

Gatazkarik gabeko gizarte bat diktadura besterik ez da. Gatazkak, hala ere, “prentsa txarra” dauka: beldurra, indarkeria eta segurtasun eza burura ekartzen dizkigu. Gatazkaren alde egotea talibanengandik edo terrorismotik oso hurbil egotearen gauza bera omen da... [+]


Eguneraketa berriak daude