Langabezia gure gizartearen kezka nagusietakoa izan arren, Euskal Herriko nahiz Espainiako Estatu osoko langileak arduratuta daude iragarritako lan eta pentsio erreformek ekarriko dutenagatik. Enpleguaren gaiarekin batera, beste bi afera hauek ere gogoan izango dituzte Maiatzaren Leheneko manifestazioek eta aldarrikapenek. Espainiako Gobernua, CCOO eta UGT espainiar sindikatuak eta Patronala aspaldian ari dira gai hauek lantzeko negoziazioetan, baina orain arte ez da akordiorik izan.

Patronalak gizarte segurantzaren enpresa kotizazioak murriztea, kaleratzeak merkatzea, kontratu mota ezegonkorragoak sortzea eta lan malgutasuna eta mugikortasuna handiagoa izatea nahi du. Sindikatuek ez dute beren jarrera zehaztu; kaleratzea merkatzearen aurka eta enplegua are gehiago ezegonkortzearen aurka daudela baino ez dute adierazi. Bestalde, Espainiako Gobernuak Patronalaren nahia betetzeko prest legoke gizarte kotizazioen murrizketari dagokionean. Halaber, badirudi lan kostu gutxiago lituzkeen kontratu mota berria onartzeko prest dagoela. Pentsioei dagokionez, Toledoko Itunean erretiratzeko adina luzatu ala ez eztabaidatzen ari dira oraindik, baita erretiro pentsioak jaso ahal izateko gutxieneko urte kopurua ere.