Sabino Arana Sarietan oso presente egon zen Alakranaren kasua. Zuk, Bermeokoa izanik, gertutik jarraituko zenuen gertatutakoa, ezta?

Ikusten duzunean zure lagunak, zu bezalako arrantzaleak, preso daudela, ez Frantzian edo Portugalen, baizik eta Somalian, kontrolik ez dagoen lekuan... gauza estua izan da. Eta arrantzaleen familiek bakarrik ez uzteko eskatu zutenean herria zutitu egin zen, gizarte guztia zutitu zen, eta horrela askatu dituzte.

Arrantzontziak armaz babestu behar direla esaten da, baina hori behin-behineko soluzioa da. Ez al da sakoneko irtenbiderik hartu behar? Zergatik joan Ozenano Indikora arrantza egitera?

Askok ez daki zer den arrantzaleen bizmodua. Ikusten dituzte etxetik urrun, itsasoan, eguraldi txarrarekin... sentsibilitatea badago. Baina zergatik Indikora? Arraina han dagoelako. Naziorteko urak dira, 200 miliatara, eta japonesak, frantsesak eta errusiarrak ere aritzen dira han. Orain, itsasoan armak hartzea ez da biharko soluzioa, beste bide bat topatu behar da. Baina hori ez dago gure esku, hori gobernuen esku dago. Indikora, Pazifikora eta angelu guztietara joango gara, txalupak horretarako daude.