Krisi ekonomikoaren ondorioz, Euskal Herriko lan merkatuak kalteak jasan ditu. Dena den, Hegoaldeari Iparraldeari baino gehiago eragin dio krisiak. 2007an, Euskal Herriko langabezia tasa %4,25ekoa zen. Baina 2009ko lehen hiruhilekorako bikoitza zen jada; %8,8, hain zuzen. Eta urtearen amaierarako, tasa hori aise gaindituko dugu. Hala ere, Euskal Herriko langabezia tasari behatzen badiogu, herrialdeen arteko aldeak handiak direla ikusiko dugu. Kontuan hartu behar da gaur egungo krisi ekonomikoak nagusiki kaltetu dituen ekoizpen sektoreak Hegoaldean presentzia handia dutela.

Hala, Gaindegiak landu dituen eta eskura ditugun azken datuek zifra hauek adierazten dituzte, Euskal Herri osoko langabezia tasaren bilakaerari dagokionez: Europar Batasunean, langabeziaren hazkunde tasaren batez bestekoa %1,4koa da; eta Euskal Herrian, berriz, %4,25ekoa. Herrialdeka: Arabak %6,9ko hazkundea zuen; Bizkaiak, %3,8koa; Gipuzkoak, %3,8koa; Nafarroan Garaiak, %5,17koa; eta Iparraldeak, %0,68koa. Nabarmena da Arabako kasua, langabetuen kopurua laukoiztu egin baita azken urteetan. Gainerako herrialdeek ere joera bera dute, Iparraldeak izan ezik.

Azpimarratzekoa da, baita ere, gazteenen langabezia tasaren bilakaera, %9tik %20ra igo baita. Generoaren ikuspuntutik, krisiaren eraginez nola gizonezkoen hala emakumezkoen langabezia tasak okerrera egin du; dena den, gehiago eragin die gizonezkoei. Bestalde, Euskal Herriko emakumeen langabezia tasa EBkoa baino puntu bat altuagoa da (%9,51koa eta %8,6koa dira, hurrenez hurren), eta Espainiako tasaren erdia (%17,7). Euskal herrialdeen arteko aldea nabarmena da: langabezia tasa txikiena Gipuzkoako emakumeena da, %6,24; altuena, berriz, Nafarroa Garaiko emakumeena, %13,67.