Oraindik goiz da jakiteko Lopez lehendakari duen Eusko Jaurlaritzak zer jarrera ofizial duen euskal arrantzaren etorkizunaz. Dakiguna da aurreko gobernuak, Ibarretxe buru zuenak, ez ziola etorkizunik ikusten itsas arrantzari. EAJk zuzendutako aurreko gobernuak 2008-2013 aldirako plan estrategiko bat landu zuen, euskal arrantza sektorea suspertzeko. Plan horretan, 170 neurri baino gehiago bildu zituzten, eta haietatik ondoriozta daiteke ez zutela itxaropenik itsas arrantzaren etorkizunean.

Plan horretan aurreikusten da batez ere lehorreko jarduera sustatzea; bereziki, eraldatze industriaren bidez. Bertan azaltzen denez, kostaldeko eremuek arrantzarekiko duten mendekotasuna murriztu beharko litzateke, bertako egitura sozioekonomikoa beste esparru batzuetara egokituz. Ontzigintza erabat gelditzearen alde egiten du, bai eta eraldatze industria garatzearen eta egokitzearen alde ere; batez ere, kontserba industria. Eta akuikultura garatzea proposatzen du, enpresen sorrera sustatuz eta profesionalen eskaintza areagotuz.