Puro Chilek esan nahi du intuizioz lan egitea; eta berez disko hau egiten denbora luzea eman duzue. Ez da hala?

U. Igartiburu: Bai, urte eta erdi pasa dugu lanean. Gauza asko egin nahi izan ditugu eta gure baliabide eta erritmoekin egin dugu; gure barneko pultsua erabiliz.

Mamen eta Urko, punkaren ezkortasunetik zatozte, baina lan honekin carpe diem-a eta izaera positiboa aldarrikatzen dituzue.

M. Rodrigo: Taldekideok oso une onean gaude, bizitzako gauza askotan botila erdi betea ikusten dugu eta ohartu gabe gure bizitzako bidaia kantuetan agerian gelditu da. Josu Zabalak kantuak entzuterakoan esan zigun harrituta gelditu zela: punk ilunetik koloredun rockera pasa garela; eta nahiz eta salbuespenak ere badiren, Josuren definizioa gustatu zitzaigun.

Diskoa autoekoiztu egin duzue eta taldearen managementa ere zuen kargu hartu duzue.

U.I.: Bai, diskoa Lorentzo Records estudiokoekin kaleratu dugu; eta orain dela gutxi lagun bat batu dugu taldera kontzertuak lortu eta landu ditzan. Guretzat beste taldekide bat da, eta bere instrumentu edo zeregina hori da (678 48 53 19). Gauzak gure modura eta konfiantzazko lagunekin egitea gustatzen zaigu; bestela zertarako egin!.

Diskoan rock gitarreroaz eta punkaren zein Anticuerposen eraginez gain, badira bluesa, reggaea, rumba eta ukitu latinoa…

M.R.: Bai, gaur egun ez gara estiloetara zabaltzearekin kikiltzen; rocka egiten dugu, baina gauza askotara irekita gaude. Nagusi egitearen gauza on bat da orain artekoarekin apurtzeak ez digula kezkatzen.

Txotxongiloek garrantzi handia daukate zuen taldean.

Bai, gure irudietako bat dira. Beti esan dugu gure helburua dela geure buruen titiritero izatea. Zuzenekoetan txotxongiloekin batera interaktuatzeko asmoa daukagu. Are gehiago, txotxongiloak herri xumearen antzerki eta albistegia ziren; eta hori errebindikatu beharra dago.