Oraindik erabakirik hartu ez bada ere, Espainiako gobernuak joan den abuztuan lana galtzen duten autonomoei buruzko Lan Ministerioaren txosten zabala aztertu zuen. Orain txostena zabaldu beharko da aurreproiektu bat osatzeko, ziur aski irailean egingo dena. Ondoren parlamentuan jarraituko du bidea, eta oso azkar egin beharko luke 2010ean ofizialki gauzatzea nahi baldin bada. Krisia piztu zenetik 300.000 autonomok utzi dute beren jarduera Espainiako Estatuan, eta orain arte ez dute langabezia-prestazioa jasotzeko aukerarik izan.

Hilero 8,3 euro

Txosten horren edukiaren arabera, lana galtzen duten autonomoek 583 eta 1.383 euro arteko laguntza jaso lezakete, sei hilabetetan gehienez ere. Prestazio hori lortu ahal izateko, autonomoek lan-istripuengatik eta lan-gaixotasunengatik kotizatu beharko dute. Mendeko autonomoek –diru-sarreren %75 baino gehiago bezero bakarrarengandik jasotzen dutenak– eta arrisku-sektoreetan lan egiten dutenek derrigorrez ordaintzen dute. Gainerako autonomoek ez dute zertan ordaindu eta eskubidea izateko kotizatu ala ez erabaki beharko dute. Hilero gutxienez 8,3 euro ordaindu beharko dituzte –gutxieneko oinarri erregulatzailearen %1–, dagoeneko lan-istripuengatik eta gaixotasunengatik ordaintzen duten kopuruaz gain, baina ordaindu beharreko kantitatea urtero eguneratuko da.
Autonomoen hainbat erakunde eta elkartek dagoeneko proposamena kritikatu dute, soilik sei hilabetera arteko prestazioak jasotzen dituelako eta autonomo baten jarduera eteteko finkatutako irizpideengatik. Ondorioz, Espainiako gobernuaren ekimenari alegazioak egingo dizkiotela adierazi dute.