Gaindegia hasiera-hasieratik jabetu da zein garrantzitsuak diren teknologia berriak mezuak eta lanak zabaltzeko. Webguneaz gain, behatoki honek beste lanabes teknologiko garrantzitsu eta interesgarria jarri du jendearen eskueran: www.atlasa.net. Gune horrek Euskal Herriko gizartearen eta ekonomiaren egoera zein den jakiteko aukera ematen du. Gainera, lanabes hori egunez egun hobetzea da asmoa.

Interneteko atlas estatistikoa da atari hori. Geografia eta Euskal Herriko gaur egungo datuak konbinatzen ditu. Euskal Herriko gizartearen eta ekonomiaren egoera hobeto ezagutzeko diseinatuta dago, baita Euskal Herria munduan kokatzeko ere.
Euskal Herriko ekonomiaren eta gizartearen atlasa lau hizkuntzatan dago: euskara, gaztelania, frantsesa eta ingelesa. Proiektua garatzeko, hainbat erakunderen laguntza izan du Gaindegiak; Eusko Jaurlaritzarena, Gipuzkoako Foru Aldundiarena, Eustat-ena, Euskal Herriko Unibertsitatearena eta Gezki-rena, hain zuzen ere.