Bizkaian, Sareak-ek Caritas Bizkaia burutzen ari den abegi proiektu bat sustatzen du, pobrezia eta bazterketaren eremuan. Abegi proiektuan funtsezko hainbat ekintza burutzen dira: entzutea, informazioa eta orientabideak eskaintzea, laguntza soziala, oinarrizko beharrak asetzeko laguntza ekonomikoa, ekimen sozialetan parte hartzea, beste aukera batzuk bilatuz salatzea eta abar. 2008an Sareak-ek 3.250 familiari eman zien laguntza. Laguntza ekonomikoei dagokienez, guztira 60.908 euro aurreratu zituzten eta otsailean, dagoeneko, horietatik 26.937 euro berreskuratu zituzten. Aurrerapen horiek hezkuntza eta gizarte laguntza prozesuetara bideratzen dira. 2008an laguntza ekonomikoek %51 egin dute gora, aurreko urteekin alderatuta. Krisialdiaren eragina jotzen da hazkunde honen arrazoitzat. Bizkaiko Caritasek 1.500.000 eurotik gorako gastua egin zuen 2008an.

Nafarroako REASen aldeko Fiare-ren Sareak libreta helburu bikoitza duen produktu finantzarioa da: aurreztaileei beren libreten interesei uko egiteko aukera ematea, eta interes horiek bankuek onartu ezin dituzten proiektuak sustatzeko erabiltzea, kopuru txikiak direlako, itzultzeko epe laburrak dituztelako edo berme nahikorik ez dutelako. Horrenbestez, proiektu horiek ohiko bankak emango ez liekeen mailegu solidarioa eskuratzen dute –bideragarritasuna aztertu ondoren–, bestela balio soziala galduko bailukete. Nafarroan “berme funts solidarioa” sortu da, proiektu horien maileguak itzuliko direla bermatzeko. Orain arte proiektu guztiek itzuli dute mailegua. Nafarroako Visualiza izeneko komunikaziorako proiektu alternatiboak 15.000 euroko mailegu solidarioa eskatu zuen eta 2008an itzultzeko epea bete zuten. Halaber, Fiarek eskatuta, Asturiasen beste ekimen bat bermatzea adostu zuten: Ecolojar izeneko autoenplegu enpresa.