Euskal Herrian betiko banku, aurrezki kutxa eta kooperatibez gain, banku solidario eta alternatibo bat ere bada. Banku honek, oraingoz, Fiare Banka Etikoa du izena eta Italian du jatorria. Duela urte batzuk Bizkaira iritsi zen eta gaur egun Euskal Herriko gainerako herrialdeetan hedatu da, baita Espainiako Estatuko gainerako tokietan ere. Bilbon estatuko 275 elkartetako ordezkariak bildu ziren, 2011rako Europa osoko kreditu kooperatiba bat sortzeko asmoz. Ohiko sistema alde batera utzi eta irizpide solidarioetan oinarrituta, finantzen arloan jarduten duen kreditu kooperatiba bat gauzatzea da ekimen honen jomuga.

2009an 1,5 milioi euroko kapital soziala biltzea dute helburu, 2011n bost milioitara iristeko. Horretarako 300 euroko gutxieneko partaidetza aurreikusi dute banakoentzat, 600 eurokoa entitate sozialentzat, eta 1.500 eurokoa enpresentzat eta beste erakunde batzuentzat. Horren bidez, 2011an 10.000 pertsonaz eta entitate sozialez gorako oinarri soziala lortu nahi dute.

Fiare Banka Etikoak gordailuen bolumena bikoiztu egin du 2008an, 2006an jarduera hasi zueneko datuekin alderatuta. 7,4 milioi eurotik, 14,1 milioitara iritsi da 2008an. Gordailu kopuru handiena Hego Euskal Herriko lau bulegoek ekarri dute: 10.786.867 euro. Hiriburuei dagokienez, Bilbok 7,27 milioi bildu zituen; Iruñeak, 2,28 milioi; Donostiak 782.000; eta Gasteizek, 448.000. Gainerakoa, 3,3 milioi euro, Bartzelonako (1, 85 milioi) eta Madrilgo (1,45 milioi) bulegoetan gordailutu ziren.