Erregimen orokorrean dauden langileen aurrean, langile autonomoen egoera bestelakoa da. 220.000 inguru dira Hego Euskal Herrian eta orain arte gainerako langileek baino babes txikiagoa izan dute. Berriki, gai hau jorratu dugu Argian (2.174 zenbakian). Ez dute sekula langabezia saria eskuratzeko aukerarik izan. Orain Espainiako gobernuaren lege berri baten zain daude, 2011tik aurrera, gehienez sei hilabetetan, prestazioa kobratzeko. Horretarako, gutxienez urtebetean hileko 26,25 euro kotizatu beharko lituzkete, orain arte ordaintzen dutenaz gain, gutxienez 583 euroko saria jasotzeko. Beraz, gehienez sei hilabeteko gizarte babesa izango dute, erregimen orokorreko langileek bi urteko babesa duten bitartean.

Datorren uda baino lehen bidera daitekeen lege proiektu horrek dioenez, babesaren iraupena kotizatutako denboraren araberakoa litzateke. Hala, 12 eta 17 hilabete artean kotizatuz gero, diru laguntza bi hilabetekoa litzateke; 18 eta 23 hilabete artean, hiru hilabetekoa; 24 eta 29 hilabete artean, lau hilabetekoa; 30 eta 35 hilabete bitartean, bost hilabetekoa; eta 36 hilabetetik gora kotizatuta, gehienez sei hilabeteko langabezia saria jasoko lukete.