Zergatik Getxon? Folkarentzat daukan esanahiagatik?

Getxoko agertokia berezia da guretzat. Duela 4 urte taldea sortu eta guztiz ezezagunak ginenean, Getxon eman ziguten jotzeko aukera. Eta hor jotzetik, guztia jarraian etorri da: lehenengo diskoa, hamaika kontzertu Euskal Herrian, Europan... Zuzenekoa grabatzea erabaki genuenean Getxon egingo genuela argi zegoen.

Zuek panderoa beso azpian etorri zineten mundura? Musikari jaio edo egin egiten da?

Azkenean etxean daukazunak eragin handia dauka. Ikerren familiak sei belaunaldi eman ditu txistua jotzen, Agusen aitona trikitilaria, Anderren aita eta anaia musikariak… Denak eragiten du, baina musikari batek musika barruan darama jaiotzen denetik.

Malagan eta Navelgasen jasotako sariek eta leku askotan izan duzuen harrera beroak erakusten du hizkuntza ez dela musikarentzako oztopo?

Hizkuntza ez da inoiz oztopo izan gure musika atzerrian defendatzeko. Euskal musika euskaraz egin behar da eta atzerrian ere talde euskaldun bat ikustera doan publikoak euskara entzun nahi du. Oztopoa izan barik, kontrakoa esango genuke: jendeak baloratzen du.

Zer esango luke Korrontzik burua altxatuko balu? Folka bere eremutik atera duzuela agian?

Ez, ez dut uste. Korrontziren garaian edozein motatako abestiak jotzen ziren trikiarekin: baltsak, pasodobleak, fandangoak. Modan zegoena jotzen zuten trikitilariek eta ez zizkioten mugak jartzen jotzen zuten musikari. Korrontzik eta bera bezalako beste askok egindakoa lepoan hartu eta aurrera segi dugu.

Mitologia gutxi jaso duzue, baina aldi berean badirudi penintsulako herri zaharrenak batzeko ezinbestekoa dela Akelarrea...

Bai, ezta? Akelarre kanta jai bihurtu zen agertokian Faltriqueira eta Xavirekin. Galizia, Katalunia eta Euskal Herria dantzan. Oso berezia izan zen kontzertuko une hura.