...sería bonito si no fuese por los putos vascos”. Bidasoa inguruetako taberna bateko komunean irakurria. Ez dut ohiturarik tabernak komuntzat erabiltzeko, baina batzuetan beharrak agintzen du eta holakotan garestiena aukeratzen dut lanak behar bezala burutzeko. Oraingoan txoferrek, garraiolariek erabiltzen duten bat egokitu zait. Ez nuen aukerarik eta tripek libratu nahi zuten. Abiatu naiz. Babel bat ate gibelean eta rotringen arrastoak mezu. Portugaldarren batena, errebindikatiboa hizki gorri larriz. Azpian, boligrafo urdinez, lerro okerrez goian aipaturikoa. Sinpatikoa gaztelarra. Ez dit beherakorik ekarri.

Haatik, lehengo astean Gaztelako herrixka bateko gasolindegiko langileak esana ekarri dit gogora: “Bete egidazu”. “Euskaldunak?”. “Bai jauna...” “Hau madrildarren komuna duzu, asteburukoa eta abuztukoa bereziki. Ikusten dituzun etxe itxi guztiak haienak dituzu, eta herritarrak haien zerbitzari. Hemen ez dugu zuek adinako barrabilik bertakoa defendatzeko eta goitik behera egiten digute. Gu ez gaitu krisiak harrapatuko, ito egingo gaitu”. Harritu egin ninduen, ez nuen asmatu deus esaten.