Horretarako indarra, abilidadea, inteligentzia eta batez ere estrategia-sena zuzen erabili beharko ditu. Indarra, bere espazio-ontzia gudan sartzean arerioa garaitzeko; abilidadea, kolonia panelekin biltegiak, komunikazio dorreak, kolonia etxeak eta zentral energetikoak eraikitzeko; inteligentzia, galderei zuzen erantzuteko; eta estrategia, borrokan hasi, lehengaiez hornitu, kanpamentuak eraiki eta galderak erantzuteko une eta leku onenak topatzeko. Lehiakide bakoitzak bere espazio-ontzia tableroan zehar laukiz lauki gidatuko du, beharrezko planeta kopurua konkistatu eta abiapuntura salbu itzultzeko. Dadoa bota duenak erabakiko du arerioaren aurka oldartuko den ala ez, planeta hau ala beste konkistatzen saiatuko den, itzalean egon eta une egokia iritsi arte ihesean ibiliko den ala, aitzitik, jokoa hasi bezain laster etsairik ipurterreenaren papera hartuko duen.

Garaile izateko hainbat froga pasa beharko dira. Arrakasta zortearen menpe izango da batzuetan, baina litekeena da astronomiari eta geologiari buruzko galderak erantzun behar izatea. Horretarako, planeta bakoitzaren ezaugarriak laburbiltzen dituzten txarteltxoen eta arau-orrietan aurki daitezkeen azalpenen laguntza izango dute lehiakideek. Bide batez, Eguzki sistemaz gauza gehiago deskubrituko dituzte, gainera. Horixe da, hain justu, Luditoys enpresaren helburuetako bat: dibertituz erakustea.