Iban Urizar Bizarra taldeko kideak Nabarran: "Duela ez asko euskarari buruz oso gauza itsusiak esan zituen AEBetako hedabide batek [Wall Street Journal-ek]. Bada, hedabide horretako nagusia eta MySpace-koa, pertsona bera dira: Robert Murdoch. Bizarra taldearen kasuan, MySpace-k ez digu asko eskaintzen, baina ulergarria da jendearentzako erreferentzia izatea. Komunitate handia da, baina, printzipio kontuengatik, guk ez dugu partaide izateko asmorik".
Kevin Herediak bere webgunean (http://kevinheredia.mundua.com): "Nork zaintzen du euskal kultura? Diruz elikatzen, esan nahi dut (...) Diru-laguntzak ematen dira, hori egia da, sariak eta halakoak antolatzen dira, hori egia da, baina zertarako balio du horrek? Nahikoa al da? Zergatik lotsatu kulturarako lau txakur txikiez enpresa eta negozio ultrasubentzionatuak ditugun herri honetan? Euskal kulturaz eta kulturatik bizitzea ameskeria da oraindik ere askorentzat, eta besteentzat, bide zinez izerditsua. Lanak ematen ditu egindako lanak kobratzeak, Canok zioen moduan: ‘Batekin aski ez eta, bi lan: lana egitea bata, kobratzea bestea’".
Andoni Arantzegi Gipuzkoako Liburu Saltzaileen Elkarteko presidenteak Diario Vascon: "Momentuz, ez dut uste liburua desagertuko denik. Agian 50 edo 100 urte barru bai, baina epe laburrean ez. Pantailak oraindik ez daude orrialde asko dituen liburua irakurtzeko prestatuta".