Baserri etxeetako sukalde errezetarik onenak

Cocina vasca con encanto. Las mejores recetas de las casas rurales liburuaren azala

Juan Mari Arzak, Martín Berasategi eta Koldo Rodero sukaldarien hitzaurreekin plazaratu du Pedro Martinek baserri etxeetako sukaldeari eskaini dion liburua. Txertoa argitaletxearen bidez argitaratu duen Cocina vasca con encanto. Las mejores recetas de las casas rurales liburuan Euskal Herri osoko baserri edo landa etxeetan aurki daitezkeen plater gozoenak izan ditu kontuan euskal gastronomian aditu dugun Pedro Martínek. 1992an kaleratu zuen Pintxos donostiarras ziri-mokaduei buruzko aurreneko liburua; 1995ean Donostia pintxo a pintxo lana; 1996an 101 Sociedades Gastronómicas de Gipuzkoa eman zuen argitara, eta Perigueux-eko (Frantzia) nazioarteko lehiaketan eskualdeko sukaldaritzari buruzko liburu hoberenaren saria irabazi zuen; 1999an El Camino de Santiago plato a plato; 2004an Ruta de monasterios de Euskal Herria eta Pinchos de Pamplona, eta 2005ean Los mejores pintxos de Donostia. Aste honetan aurkeztu dizuegun lanean aipatutako baserri etxe bakoitzeko kokalekuaz eta platerik onenen errezetez gainera, etxea osorik alokatzeko aukerarik dagoen ala ez, eta nekazaritza lanetan parte hartzerik izan dezakegun ala ez ere zehaztu du.

Garbi azaldu nahi izan dut gastronomia kultura ere badela

Gastronomiari eskainitako zortzi liburu badituzu plazaratuak. Haiek osatzean, zertan jarri izan duzu bereziki arreta?

Garbi azaldu nahi izan dut gastronomia kultura ere badela. Horretarako, liburu guztietan gastronomia, kultura eta argibideak batu izan ditut. Denetan aurkituko ditu irakurleak honako zehaztasunok: pintxo edo plateren batzuk nola egin daitezkeen; horiek horrela egiten dituen ostatuaren argibideak eta jatetxe hori kokatutako herriaren historia eta idiosinkrasia. Horretara mugatzen naiz, ni ez naizelako inor pintxo edo plater bati kalifikazioa jartzeko, ezta herri bat bestea baino ederragoa dela epaitzeko ere.

Zer aurkituko du irakurleak Cocina vasca con encanto. Las mejores recetas de las casas rurales-en?

Aurrekoetan ibilitako bide berari jarraitu diot, eta espero dut liburuan agertzen diren argazkiak (Alex Iturraldek egin ditu guztiak) eta bildu ditudan sukalde errezetak, baserri etxeen kokalekuaren gaineko zehaztasunak eta aldiro aipatzen dudan baserri etxeari buruzko argibideak balioko diotela irakurleari antzemateko gure baserri etxe, landa turismo eta baserri hotelek daukaten eskaintza turistikoaren, gastronomikoaren eta kulturalaren maila.

Nolakoa da maila hori?

Ziurtatu dezaket baserri etxeetako erosotasunak, harremana eta zerbitzuak ez diotela inongo inbidiarik izan behar gure hiri handi eta txikietan dauden bestelako ostalaritza etxeetakoei. Alde on nabarmena dute, gainera, baserri etxeek: lasaitasuna eskaintzen dute eta etxeko produktu biologikoekin egindako gastronomia.