Kindle testu irakurgailuak mahai gainean jarri du, enegarrenez, liburuaren balizko heriotzaren kalaka. Amazon etxeak, sarean denik eta liburu denda handienak, merkaturatu zuen produktua joan den urtearen hondarrean, arrakasta handiz merkaturatu ere: bost ordu eta erdian agortu egin ziren salgai jarritako Kindle guztiak. Hau izango ote, beraz, etorkizuneko testu irakurgailua? Aurkitu al dute dagoeneko liburua akabatuko duen liburu elektronikoa?
Momentuz, eta azken orduko berririk ezean, zerrenda luze baten azken izena baino ez da Kindle. Ezen aurretik, teknologiaren sukarrak eraginda, liburu elektroniko dezente merkaturatu baitituzte borroka horretan ari diren enpresek: Rocket ebook, Softbook, Librius, Everybook, Glassbook, Gemstar, Cytale, guztiak ere, oraindik orain, pot egindako saiakerak. Gisa horretako gailu ugari jaio, merkatuan txoko bat egiten saiatu eta hil dira 1999tik hona, eta bakar batek ere ez du lortu egonkortzea, ez eta liburu tradizionalari terrenoa jatea ere.
Arrazoia ez da hain estrainioa: merkaturatu eta saldu nahi den gauza oro beharrezkoa, ordezkaezina dela sinetsarazi behar zaio erosleari. Eta, egia esan, egun testu digitalizatu gutxi dago, testu gutxi sarean; jende gutxik du beharrezkoa den ekipo informatikoa behar bezala erabiltzeko ezagutza nahikoa; sareko metodo askok testu digitala inprimatzera behartzen dute irakurlea; irakurketa hipertextuala kaotikoa izan daiteke, aberastu baino nahas dezake; ez da argi ikusten nola gordeko diren testuak, ez eta nola sailkatu edo babestu behar diren ere. Beharrezkotik, ordezkaezinetik gutxi dute, beraz, aparailuok.
Horrek zer esan nahi du, liburu elektronikoak ez direla tresna erabilgarri eta baliagarri izango? Ez da hori gaian aditu direnen iritzia. Momentuz, gailu berriak diseinatu eta merkaturatzen dituzte etenik gabe, behin betikoa noiz iritsiko. Kurioski, paperaren ehundura eta irakurgarritasuna imitatzen saiatzen dira horietarik batzuk.